കണ്ണൂര് ആര്ടി ഓഫീസ് സംഘര്ഷക്കേസില് വ്ളോഗര്മാരായ ലിബിനും എബിനും ജാമ്യം. പൊതുമുതല് നശിപ്പിപ്പിച്ചതിന് 3500 രൂപ വീതം ഇരുവരും കെട്ടി വയ്ക്കണമെന്ന് കോടതി ആവശ്യപ്പെട്ടു. കണ്ണൂര് ഒന്നാം ക്ലാസ് ജുഡീഷ്യല് മജിസ്ട്രേറ്റ് കോടതിയാണ് ജാമ്യം അനുവദിച്ചത്.
കണ്ണൂര് ആര്ടി ഓഫീസിലെ സംഘര്ഷത്തില് നാശനഷ്ടങ്ങളുടെ പിഴ ഒടുക്കാമെന്ന് ജെറ്റ് സഹോദരങ്ങള് ഇന്ന് കോടതിയെ അറിയിച്ചിരുന്നു. ആര്ടി ഓഫീസില് ഉണ്ടായ നാശനഷ്ടങ്ങളുടെ പിഴ എത്രയായാലും അത് ഒടുക്കാമെന്ന ഇവരുടെ അഭിഭാഷകനാണ് കണ്ണൂര് ചീഫ് ജുഡീഷ്യല് മജിസ്ട്രേറ്റ് കോടതിയെ അറിയിച്ചത്. കേസില് വാദം കേള്ക്കവെയാണ് അഭിഭാഷകന് ഇക്കാര്യം അറിയിച്ചത്. ആര്ടി ഓഫീസില് ഉണ്ടാക്കിയ നാശനഷ്ടങ്ങളുടെ കണക്ക് ബോധ്യപ്പെടുത്താനും കോടതി നിര്ദേശം നല്കിയിരുന്നു.
അതേസമയം, ബിഹാറില് ഇരുവരും നടത്തിയ നിയമ ലംഘനത്തില് പ്രാഥമിക പരിശോധന തുടങ്ങിയെന്ന് പൊലീസ് അറിയിച്ചു. ഇ ബുള്ജെറ്റ് യുട്യൂബ് ചാനലിലെ മുഴുവന് വീഡിയോകളും പരിശോധിക്കുമെന്നും ഇതിനായി പ്രത്യേക സംഘത്തെ നിയോഗിക്കുമെന്നും കണ്ണൂര് സിറ്റി പോലീസ് കമ്മിഷണര് ആര്. ഇളങ്കോ അറിയിച്ചു. നിയമലംഘനങ്ങള് കണ്ടെത്തുന്ന വിഡിയോകള് മരവിപ്പിക്കാന് യൂട്യൂബിനോട് ആവശ്യപ്പെടും. അപ്ലോഡ് ചെയ്ത വീഡിയോകള് മുഴുവന് പരിശോധിക്കേണ്ടതിനാല് അവ ഡിലീറ്റ് ചെയ്യാതിരിക്കാന് യൂട്യൂബിന് ഫ്രീസിംഗ് റിപ്പോര്ട്ട് നല്കിയിട്ടുണ്ട്. മോശം കമന്റിടുന്ന കുട്ടികള്ക്കെതിരെ ജുവനൈല് ആക്ട് പ്രകാരം കേസെടുക്കുമെന്നും ഇളങ്കോ വ്യക്തമാക്കി. അഭിപ്രായം പ്രകടിപ്പിക്കാന് എല്ലാ പൗരന്മാര്ക്കും അവകാശമുണ്ട്. തെറ്റായ നടപടികള് ഉണ്ടായിട്ടുണ്ടെങ്കില് മേലധികാരികളുടെ ശ്രദ്ധയില്പ്പെടുത്തുകയോ കോടതിയെ സമീപിക്കുകയോ ചെയ്യാം. അതിനു പകരം നിയമലംഘനം പ്രോത്സാഹിപ്പിക്കുന്ന തരത്തിലും നിയമപാലകരെ അധിക്ഷേപിക്കുന്ന തരത്തിലും സമൂഹമാധ്യമങ്ങളില് ഇടപെടുന്നതു ശരിയല്ല. ഇത്തരക്കാര്ക്കെതിരെ കര്ശന നടപടിയുണ്ടാകും അദ്ദേഹം പറഞ്ഞു. പൊതുമുതല് നശിപ്പിക്കല്, ഔദ്യോഗിക കൃത്യനിര്വഹണത്തിന് തടസ്സം നില്ക്കല്, കൊവിഡ് മാനദണ്ഡ ലംഘനം എന്നീ വകുപ്പുകള് ചുമത്തിയാണ് കേസെടുത്തത്.
ഇതിനിടെ, ഇ ബുള് ജെറ്റ് സഹോദരന്മാരുടെ നിയമലംഘനത്തില് കര്ശനനടപടികളുമായി മോട്ടോര് വാഹന വകുപ്പും രംഗത്തെത്തി. ലിബിന്റെയും എബിന്റെയും വാഹനത്തിന്റെ രജിസ്ട്രേഷനും വാഹനം ഓടിച്ച വ്യക്തിയുടെ ലൈസന്സ് റദ്ദ് ചെയ്യാനും തീരുമാനിച്ചിട്ടുണ്ടെന്ന് ട്രാന്സ്പോര്ട് കമ്മീഷണര് എഡിജിപി എംആര് അജിത് കുമാര് അറിയിച്ചു.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയവിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !