ആദ്യ ടെസ്റ്റിന്റെ മൂന്നാം ദിനത്തില് ഇന്ത്യന് ബാറ്റിങ് നിരയ്ക്ക് നാണക്കേടിന്റെ റെക്കോര്ഡ്. പേരുകേട്ട ഇന്ത്യന് ബാറ്റിങ് നിരയെ ഓസീസ് പേസര്മാര് തകര്ത്തെറിഞ്ഞു. 21.2 ഓവറില് ഒമ്ബത് വിക്കറ്റ് നഷ്ടത്തില് 36 റണ്സില് ഇന്ത്യന് സ്കോര് ഒതുക്കി. ടെസ്റ്റില് ഇന്ത്യയുടെ ഏറ്റവും ചെറിയ സ്കോറാണിത്. 1974ല് ലോര്ഡ്സില് ഇംഗ്ലണ്ടിനെതിരേ 42 റണ്സിന് പുറത്തായതായിരുന്നു ഇതിന് മുമ്ബത്തെ ചെറിയ സ്കോര്. അവസാനം ക്രീസിലെത്തിയ മുഹമ്മദ് ഷമി, പാറ്റ് കമ്മിന്സിന്റെ പന്ത് തട്ടി റിട്ടയേര്ഡ് ഹര്ട്ടായി മടങ്ങിയതോടെ ഇന്ത്യന് ഇന്നിങ്സ് അവസാനിക്കുകയായിരുന്നു. ഇന്ത്യന് നിരയില് ഒരാള് പോലും രണ്ടക്കം കടന്നില്ല. അഞ്ച് ഓവറില് എട്ട് റണ്സ് മാത്രം വഴങ്ങി 5 വിക്കറ്റ് വീഴ്ത്തിയ ജോഷ് ഹെയ്സല്വുഡും 4 വിക്കറ്റെടുത്ത പാറ്റ് കമ്മിന്സുമാണ് ഇന്ത്യയെ തകര്ത്തത്. മൂന്നാം ദിനം ഒരു വിക്കറ്റ് നഷ്ടത്തില് ഒമ്ബത് റണ്സെന്ന നിലയില് ബാറ്റിങ് ആരംഭിച്ച ഇന്ത്യയ്ക്ക് തുടക്കത്തില് തന്നെ പാറ്റ് കമ്മിന്സ് തിരിച്ചടി നല്കി. ആദ്യം നൈറ്റ് വാച്ച്മാന് ജസ്പ്രീത് ബുംറയെ (2) പുറത്താക്കി. പിന്നാലെ ചേതേശ്വര് പൂജാര (0), ക്യാപ്റ്റന് വിരാട് കോഹ്ലി (4) എന്നിവരെയും കമ്മിന്സ് മടക്കി.
മൂന്നാം ദിനത്തിലെ തന്റെ ആദ്യ പന്തില് തന്നെ മായങ്ക് അഗര്വാളിനെ പുറത്താക്കി ജോഷ് ഹെയ്സല്വുഡും തകര്പ്പന് പ്രകടനമാണ് പുറത്തെടുത്തത്. പിന്നാലെ അജിങ്ക്യ രഹാനെയും (0) ഹെയ്സല്വുഡിനു മുന്നില് വീണു. ഹനുമ വിഹാരി (8), വൃദ്ധിമാന് സാഹ (4), ആര്. അശ്വിന് (0) എന്നിവരെയും മടക്കി ഹെയ്സല്വുഡ് അഞ്ച് വിക്കറ്റും ടെസ്റ്റ് കരിയറില് 200 വിക്കറ്റ് നേട്ടവും സ്വന്തമാക്കി.
ആദ്യ ഇന്നിങ്സില് 53 റണ്സിന്റെ വിലപ്പെട്ട ലീഡ് സ്വന്തമാക്കിയ ഇന്ത്യ രണ്ടാം ദിനം കളിയവസാനിക്കുമ്ബോള് ഒരു വിക്കറ്റ് നഷ്ടത്തില് ഒമ്ബത് റണ്സെന്ന നിലയിലായിരുന്നു. നാലു റണ്സെടുത്ത പൃഥ്വി ഷായുടെ വിക്കറ്റാണ് രണ്ടാം ഇന്നിങ്സില് ഇന്ത്യയ്ക്ക് ആദ്യം നഷ്ടമായത്. നേരത്തെ ഇന്ത്യയുടെ ഒന്നാം ഇന്നിങ്സ് സ്കോറായ 244ന് എതിരേ ബാറ്റിങ്ങിനിറങ്ങിയ ഓസ്ട്രേലിയ 191 റണ്സിന് പുറത്തായിരുന്നു. 99 പന്തില് നിന്ന് 10 ഫോറുകളടക്കം 73 റണ്സോടെ പുറത്താകാതെ നിന്ന ക്യാപ്റ്റന് ടിം പെയ്നാണ് ഓസീസ് സ്കോര് 191ല് എത്തിച്ചത്.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയ വിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !