സംസ്ഥാനത്ത് കൊവിഡ് വ്യാപനം കുറഞ്ഞു; വാക്സിൻ ഫലപ്രദമെന്ന് മുഖ്യമന്ത്രി

തിരുവനന്തപുരം: സംസ്ഥാനത്ത് ഒരാഴ്ചയ്ക്കിടെ കൊവിഡ് രോഗികളുടെ എണ്ണം 13 ശതമാനം കുറഞ്ഞെന്ന് മുഖ്യമന്ത്രി പിണറായി വിജയൻ. വാർത്താ സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്.

സെപ്റ്റംബർ 25 ന് ശേഷം ഏറ്റവും കുറഞ്ഞ പ്രതിദിന രോഗബാധയാണ് വ്യാഴാഴ്ച രേഖപ്പെടുത്തിയതെന്ന് മുഖ്യമന്ത്രി പറഞ്ഞു. കൊവിഡ് വാക്സിനായ കൊവാക്സിൻ ഫലപ്രദമാണെന്നും മുഖ്യമന്ത്രി വ്യക്തമാക്കി. ജനിതകമാറ്റം വന്ന യുകെ വൈറസിന് ഉൾപ്പെടെ കൊവാക്സിൻ ഫലപ്രദമാണെന്ന് അദ്ദേഹം കൂട്ടിച്ചേർത്തു.

കൊവിൻ പോർട്ടലിൽ 15 ദിവസത്തെ വാക്സിനേഷൻ സെഷനുകൾ സൃഷ്ടിക്കും. വാക്സിനേഷൻ കേന്ദ്രങ്ങൾ വർദ്ധിപ്പിക്കും. കൊവിഡ് കേന്ദ്രങ്ങളിൽ നേരിട്ടെത്തുന്നവർക്ക് ടോക്കൺ സംവിധാനം ഏർപ്പെടുത്തുമെന്നും മുഖ്യമന്ത്രി വ്യക്തമാക്കി.

അതേസമയം, രാജ്യത്ത് പ്രതിദിന കൊവിഡ് കേസുകളിലെ വർധനവ് മാറ്റമില്ലാതെ തുടരുകയാണ്. കേരളത്തിൽ ഇന്നലെ 2700ൽ അധികം കൊവിഡ് കേസുകളാണ് റിപ്പോർട്ട് ചെയ്തിരിക്കുന്നത്. നിലവിൽ രാജ്യത്ത് ആശങ്ക ഉയർത്തുന്നത് മഹാരാഷ്ട്രയിലേയും കേരളത്തിലെയും കൊവിഡ് കേസുകളാണ്. കേന്ദ്ര ആരോഗ്യമന്ത്രാലയം പുറത്തുവിട്ട കണക്ക് അനുസരിച്ച് കഴിഞ്ഞ 24 മണിക്കൂറിനിടെ 17,407 കേസുകളാണ് രാജ്യത്ത് റിപ്പോര്‍ട്ട് ചെയ്തിരിക്കുന്നത്.

ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയ വിഷൻ ലൈവ്  ന്റെ WhatsApp  ഗ്രൂപ്പിൽ അംഗമാവുക !