എറണാകുളം രാജഗിരി ആശുപത്രിയില് വെച്ച് മസ്തിഷ്ക മരണം സംഭവിച്ച നേവിസിന്റെ(25) ഹൃദയവും വഹിച്ച് കൊണ്ടുള്ള വാഹനം കോഴിക്കോട് മെട്രോ ഇന്റർനാഷണൽ ആശുപത്രിയിലേക്ക് പുറപ്പെട്ടിരിക്കുകയാണ്. വാഹനത്തിന് വഴിയൊരുക്കണമെന്ന് സമൂഹ മാധ്യമങ്ങളിലൂടെ അഭ്യർഥിച്ചിരിക്കുകയാണ് ആരോഗ്യമന്ത്രി വീണ ജോർജ്. അവയവദാന പ്രക്രിയക്കും യാത്രക്കും വേണ്ട ക്രമീകരണങ്ങളെല്ലാം സര്ക്കാര് ഒരുക്കിയിട്ടുണ്ട്. എങ്കിലും എല്ലാവരും വഴിയൊരുക്കി ഈ വാഹനത്തെ കടത്തി വിടണം എന്നാണ് വീണ ജോർജിന്റെ അഭ്യർഥന.
ഫ്രാന്സില് അക്കൗണ്ടിങ് മാസ്റ്ററിന് പഠിക്കുകയായിരുന്നു നേവിസ്. കോവിഡ് കാരണം ഇപ്പോള് ഓണ്ലൈനായാണ് ക്ലാസ്. നേവിസിനെ സെപ്റ്റംബർ 16ന് വീട്ടിൽ അബോധാവസ്ഥയിൽ കണ്ടെത്തുകയായിരുന്നു. മസ്തിഷ്ക മരണം സംഭവിച്ച നേവിസിന്റെ ഹൃദയം, കരള്, കൈകള്, രണ്ട് വൃക്കകള്, കണ്ണുകള് എന്നിവയും ദാനം ചെയ്തിട്ടുണ്ട്. കോഴിക്കോട് ഹൃദയം സ്വീകരിക്കുന്നത് ആരാണെന്ന് മന്ത്രി വ്യക്തമാക്കിയിട്ടില്ല. സാജന് മാത്യുവാണ് നേവിസിന്റെ പിതാവ്. മാതാവ്: ഷെറിൻ. സഹോദരങ്ങൾ: എല്വിസ്, വിസ്മയ.
ആരോഗ്യമന്ത്രിയുടെ ഫേസ്ബുക് പോസ്റ്റ്:
എറണാകുളം രാജഗിരി ആശുപത്രിയില് വച്ച് മസ്തിഷ്ക മരണം സംഭവിച്ച കോട്ടയം വടവത്തൂര് കളത്തില്പടി ചിറത്തിലത്ത് ഏദന്സിലെ നേവിസിന്റെ (25) ഹൃദയവും വഹിച്ച് കൊണ്ടുള്ള വാഹനം കോഴിക്കോട് മെട്രോ ഇന്റർനാഷണല് ആശുപത്രിയിലേക്ക് പോകുകയാണ്. എത്രയും വേഗം ഹൃദയം കോഴിക്കോട് എത്തിച്ച് ചികിത്സയിലുള്ള രോഗിയില് വച്ച് പിടിപ്പിക്കണം. ഓരോ നിമിഷവും പ്രധാനമാണ്. അവയവദാന പ്രക്രിയയ്ക്കും സുഗമമായ യാത്രയ്ക്കും വേണ്ട ക്രമീകരണങ്ങളെല്ലാം സര്ക്കാര് ഒരുക്കിയിട്ടുണ്ട്. ഇക്കാര്യം ബഹു. മുഖ്യമന്ത്രിയുടെ ശ്രദ്ധയില്പ്പെടുത്തി. മുഖ്യമന്ത്രിയുടെ നിര്ദേശാനുസരണം പോലീസ് ഉദ്യോഗസ്ഥര് ഗതാഗത ക്രമീകരണമൊരുക്കുന്നുണ്ട്. എങ്കിലും എല്ലാവരും വഴിയൊരുക്കി ഈ വാഹനത്തെ കടത്തി വിടേണ്ടതാണ്.
ഫ്രാന്സില് അക്കൗണ്ടിങ് മാസ്റ്ററിന് പഠിക്കുകയായിരുന്നു നേവിസ്. കോവിഡ് കാരണം ഇപ്പോള് ഓണ്ലൈനായാണ് ക്ലാസ്. കഴിഞ്ഞ 16നാണ് സംഭവമുണ്ടായത്. രാത്രിയുള്ള പഠനം കഴിഞ്ഞിട്ട് ഉണരാന് വൈകിയിരുന്നു. എട്ടാം ക്ലാസില് പഠിക്കുന്ന സഹോദരി വിസ്മയ വിളിച്ചുണര്ത്താന് ചെന്നപ്പോള് അബോധാവസ്ഥയില് കിടന്നിരുന്നു. ഉടന് തന്നെ കോട്ടയം കാരിത്താസ് ആശുപത്രിയില് എത്തിക്കുകയായിരുന്നു. രക്തത്തിലെ പഞ്ചസാരയുടെ അളവ് ക്രമാതീതമായി താഴ്ന്നതു മൂലമുള്ള പ്രശ്നമായിരുന്നു.
ആരോഗ്യനിലയില് വലിയ മാറ്റം വരാത്തതിനാല് 20-ാം തീയതി എറണാകുളം രാജഗിരി ആശുപത്രിയില് എത്തിച്ചു. ഇന്നലെ മസ്തിഷ്ക മരണം സ്ഥിരീകരിച്ചതോടെ നേവിസിന്റെ അച്ഛനും അമ്മയും സ്വമേധയാ അവയവദാനത്തിന് മുന്നോട്ട് വരികയായിരുന്നു. ഹൃദയം, കരള്, കൈകള്, രണ്ട് വൃക്കകള്, കണ്ണുകള് എന്നിവയാണ് ദാനം ചെയ്തത്. കേരള സര്ക്കാരിന്റെ മരണാന്തര അവയവദാന പദ്ധതിയായ മൃതസഞ്ജീവനി (കെ.എന്.ഒ.എസ്.) വഴിയാണ് അവയവദാന പ്രക്രിയ നടത്തിയത്.
ഏറെ വിഷമ ഘട്ടത്തിലും അവയവദാനത്തിന് മുന്നോട്ട് വന്ന അച്ഛന് സാജന് മാത്യുവിനേയും അമ്മ ഷെറിനേയും സഹോദരന് എല്വിസിനേയും സര്ക്കാന്റെ എല്ലാ ആദരവും അറിയിക്കുന്നു.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയവിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !