കണ്ണൂര്: പ്രശസ്ത മാപ്പിളപ്പാട്ട് ഗായകന് പീര് മുഹമ്മദ് (75) അന്തരിച്ചു. ഇന്ന് പുലര്ച്ച മുഴുപ്പിലങ്ങാട്ടെ വസതിയിലായിരുന്നു അന്ത്യം. വാര്ധക്യ സഹജമായ അസുഖങ്ങളെ തുടര്ന്നാണ് അന്ത്യം.
ഒട്ടകങ്ങള് വരിവരി വരിയായ് , കാഫ് മല കണ്ട പൂങ്കാറ്റേ തുടങ്ങിയ സൂപ്പര് ഹിറ്റ് ഗാനങ്ങള് ഇദ്ദേഹത്തിന്റേതാണ്. എ.ടി. ഉമ്മറിന്റെ സംഗീതത്തില് 'കോടി ചെന്താമരപ്പൂ വിരിയിക്കും പീലിക്കണ്ണാല്…' (സിനിമ: അന്യരുടെ ഭൂമി), കെ. രാഘവന്റെ സംഗീതത്തില് 'നാവാല് മൊഴിയുന്നേ…' (തേന്തുള്ളി) എന്നീ സിനിമാഗാനങ്ങള് പാടി.
1945 ജനുവരി 8 ന് തമിഴ്നാട്ടിലെ തെങ്കാശിക്കടുത്തുള്ള 'സുറണ്ടൈ' ഗ്രാമത്തിലാണ് പീര് മുഹമ്മദിന്റെ ജനനം. തെങ്കാശിക്കാരിയായ ബല്ക്കീസായിരുന്നു മാതാവ്. തലശ്ശേരിക്കാരനായ അസീസ് അഹമ്മദ് പിതാവും. നാലു വയസ്സുള്ളപ്പോള് പിതാവുമൊത്ത് അദ്ദേഹം തലശ്ശേരിയിലെത്തി. തായത്തങ്ങാടി താലിമുല് അവാം മദ്രസ യു.പി സ്കൂള്, തലശ്ശേരിയിലെ സെന്റ് ജോസഫ്സ് ഹൈസ്കൂള്, മുബാറക് ഹൈസ്കൂള് എന്നിവിടങ്ങളിലായി പഠനം. പിന്നീട് തളിപ്പറമ്ബ് സര് സയ്യിദ് കോളേജില് നിന്നും ബിരുദം നേടി.
എട്ടാം വയസില് പാടിത്തുടങ്ങി. തലശേരി ജനത സംഗീത സഭയിലൂടെയാണ് ഈ രംഗത്തെത്തുന്നത്. പി ടി അബ്ദുറഹിമാന്റെ വരികളാണ് പാടിയവയില് ഏറെയും. തമിഴ് മുരുക ഭക്തിഗാനങ്ങളും ഇദ്ദേഹം പാടിയിട്ടുണ്ട്.
1976ല് ഇന്ത്യന് ടെലിവിഷന് ചരിത്രത്തില് ആദ്യമായി ദൂരദര്ശനില് ചെന്നൈ നിലയത്തില് മാപ്പിളപ്പാട്ട് അവതരിപ്പിച്ച പ്രതിഭയാണ് പീര് മുഹമ്മദ്. കേരളത്തിലും ഗള്ഫിലും വീറും വാശിയുമുള്ള മാപ്പിള ഗാനമേള മല്സരങ്ങളില് വിജയിയായിട്ടുണ്ട്.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയവിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !