ചലച്ചിത്രനടന് കോട്ടയം പ്രദീപ് അന്തരിച്ചു. ഹൃദയാഘാതത്തെ തുടര്ന്ന് കോട്ടയത്തെ സ്വകാര്യ ആശുപത്രിയിലാണ് അന്ത്യം. വീട്ടില് വച്ച് ഹൃദയാഘാതം ഉണ്ടായതിനെ തുടര്ന്ന് ആശുപത്രിയിലേക്ക് പോവുകയായിരുന്നു.
2001 പുറത്തിറങ്ങിയ ഈ നാട് ഇന്നലെ വരെ എന്ന സിനിമയിലാണ് ആദ്യമായി അഭിനയിച്ചത് തമിഴ് സിനിമയില് അടക്കം ശ്രദ്ധേയ വേഷങ്ങള് ചെയ്തു. വിണ്ണൈത്താണ്ടി വരുവായ, കട്ടപ്പനയിലെ ഋതിക് റോഷന്, ഒരു വടക്കന് സെല്ഫി കുഞ്ഞിരാമായണം, തോപ്പില് ജോപ്പന് തുടങ്ങി നൂറോളം സിനിമകളില് അഭിനയിച്ചു. കോട്ടയം കുമാരനല്ലൂര് സ്വദേശിയാണ് കോട്ടയം പ്രദീപ്. ജനിച്ചതും വളര്ന്നതുമെല്ലാം കോട്ടയം ജില്ലയിലെ തിരുവാതുക്കലായിരുന്നു.
സ്കൂളില് പഠിക്കുന്ന സമയത്ത് യുവജനോത്സവത്തിലും സ്കൂള് വാര്ഷിക പരിപാടികളിലും പ്രദീപ് സജീവമായിരുന്നു. പാട്ട്, ഡാന്സ്, എകാങ്കനാടകം തുടങ്ങിയവയിലായിരുന്നു പ്രധാനമായും പങ്കെടുത്തിരുന്നത്. വര്ഷങ്ങളായി കോട്ടയം തിരുവാതുക്കല് രാധാകൃഷ്ണ തീയേറ്ററിന് സമീപം താമസിച്ചിരുന്ന അദ്ദേഹം, പതിയെ സിനിമയിലേക്ക് ആകൃഷ്ടനായി. പത്താം വയസ്സില് എന് എന് പിള്ളയുടെ ”ഈശ്വരന് അറസ്റ്റില്” എന്ന നാടകത്തില് ബാലതാരമായി അഭിനയിച്ച് തുടങ്ങിയ കോട്ടയം പ്രദീപ് നാല്പത് വര്ഷമായി നാടകരംഗത്ത് സജീവമാണ്.
കാരാപ്പുഴ സര്ക്കാര് സ്കൂളിലും ബസേലിയസ് കോളജിലും കോപ്പറേറ്റീവ് കോളജിലുമായി പഠനം പൂര്ത്തിയാക്കി. 1989 മുതല് എല് ഐ സി ഉദ്യോഗസ്ഥനായി. അവസ്ഥാന്തരങ്ങള് എന്ന ടെലി സീരിയലിനു ബാലതാരങ്ങളെ ആവശ്യമുണ്ട് എന്ന് കണ്ട് മകനെയും കൂട്ടി സെറ്റിലെത്തിയപ്പോഴാണ് മകന് പകരം സീനിയര് ആയ ഒരു റോളില് അച്ഛനായ കോട്ടയം പ്രദീപിന് ടെലിവിഷനില് ആദ്യ അവസരം ലഭിക്കുന്നത്. നിര്മാതാവ് പ്രേം പ്രകാശാണ് അദ്ദേഹത്തിന് ആ അവസരം നല്കിയത്.
ആദ്യം സിനിമാ ക്യാമറയ്ക്ക് മുന്നില് വരുന്നത് 1999 ല് ഐ.വി. ശശി ചിത്രമായ ഈ നാട് ഇന്നലെ വരെയിലൂടെയാണ്. നരേന്ദ്രപ്രസാദിനൊപ്പം ഒരു ചെറു വേഷമാണ് ആന്ന് അഭിനയിച്ചത്. തുടര്ന്ന് നിരവധി ചിത്രങ്ങളില് ചെറു വേഷങ്ങളില് അഭിനയിച്ചു. 2009 ല് ഗൗതം മേനോന്റെ ”വിണ്ണൈത്താണ്ടി വരുവായ” എന്ന ചിത്രത്തില് നായികയായ തൃഷയുടെ മലയാളി അമ്മാവനായി ഒരു ചെറു വേഷം ചെയ്തു. യാതൊരു പ്രതീക്ഷയുമില്ലാതെ, ഗൗതം മേനോനെ കാണുക എന്ന ആഗ്രഹവുമായി നന്ദു പൊതുവാള് വഴി ഒഡീഷനു പോയ പ്രദീപിന് അവിചാരിതമായി നറുക്ക് വീഴുകയായിരുന്നു.
അതിലെ ഡയലോഗ് ശ്രദ്ധ നേടിയതോടെ കോട്ടയം പ്രദീപിനെ തേടി അവസരങ്ങള് വന്നെത്തി. ആ ചിത്രത്തിന്റെ തന്നെ ഹിന്ദി, തെലുങ്ക് പതിപ്പുകളിലും പ്രദീപ് വേഷമിട്ടു. വിനീത് ശ്രീനിവാസന്റെ തട്ടത്തിന് മറയത്തിലെ പോലീസ് കോണ്സ്റ്റബിളിന്റെ വേഷം ചെയ്ത ശേഷം പ്രദീപ് മലയാളത്തിലെ മിക്ക സിനിമകളുടെയും ഭാഗമായി മാറി. തമിഴില് രാജാ റാണി, നന്പനട തുടങ്ങി നിരവധി ചിത്രങ്ങളിലും അഭിനയിച്ചു. ഭാര്യ മായ, മക്കള് വിഷ്ണു, വൃന്ദ.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയവിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !