എല്ലാ ഭാരതീയര്‍ക്കും സ്വാതന്ത്ര്യ ദിന ആശംസകള്‍ നേര്‍ന്ന് രാഷ്ട്രപതി ദ്രൗപതി മുര്‍മു.
സ്വാതന്ത്ര്യ സമര സേനാനികളെ രാജ്യം സ്മരിക്കുന്നു. വിദേശികള്‍ ഇല്ലായ്മ ചെയ്യാന്‍ ശ്രമിച്ച രാജ്യത്തെ നാം തിരിച്ചുപിടിച്ചു. രാജ്യമെമ്പാടും ത്രിവര്‍ണ പതാകകള്‍ അഭിമാനത്തോടെ പാറുന്നു. നമ്മുടെ രാജ്യം മറ്റ് രാജ്യങ്ങള്‍ക്ക് മാതൃകയാണ്. കോവിഡിനെ ഫലപ്രദമായി നാം നേരിട്ടു. സാങ്കേതിക രംഗത്തും രാജ്യം വലിയ നേട്ടങ്ങള്‍ കൈവരിച്ചു. ജനാധിപത്യം കൂടുതല്‍ ശക്തമാകുകയാണ്. രാജ്യത്തെ അഭിസംബോധന ചെയ്യുന്നതില്‍ അഭിമാനമെന്നും ദ്രൗപതി മുര്‍മു പറഞ്ഞു.
പല പരമ്പരാഗത രീതികളും വേലിക്കെട്ടുകളും മറികടന്നാണ് സ്ത്രീകള്‍ മുന്നോട്ട് പോകുന്നത്. സാമൂഹികവും രാഷ്ട്രീയവുമായ പ്രക്രിയകളില്‍ അവരുടെ വര്‍ദ്ധിച്ചുവരുന്ന പങ്കാളിത്തം വരും കാലങ്ങളില്‍ നിര്‍ണായകമാണെന്ന് തെളിയിക്കും. ഇന്ന് നമ്മുടെ പഞ്ചായത്തീരാജ് സ്ഥാപനങ്ങളില്‍ തിരഞ്ഞെടുക്കപ്പെട്ട വനിതാ പ്രതിനിധികളുടെ എണ്ണം പതിനാല് ലക്ഷത്തിലേറെയാണ്. നമ്മുടെ രാജ്യത്തിന്റെ പല പ്രതീക്ഷകളും നമ്മുടെ പെണ്‍മക്കളിലാണ്. ശരിയായ അവസരങ്ങള്‍ ലഭിച്ചാല്‍ അവര്‍ക്ക് മികച്ച വിജയം നേടാനാകും. യുദ്ധവിമാന-പൈലറ്റ് മുതല്‍ ബഹിരാകാശ ശാസ്ത്രജ്ഞര്‍ വരെ നമ്മുടെ പെണ്‍മക്കള്‍ എല്ലാ മേഖലകളിലും തിളങ്ങുന്നുവെന്നും രാഷ്ട്രപതി കൂട്ടിച്ചേര്‍ത്തു.
64കാരിയായ ദ്രൗപതി മുര്‍മു കഴിഞ്ഞ മാസമാണ് പ്രസിഡന്റായി തിരഞ്ഞെടുക്കപ്പെട്ടത്. മുന്‍ ജാര്‍ഖണ്ഡ് ഗവര്‍ണറാണ്. രാഷ്ട്രപതി പദത്തിലെത്തുന്ന ആദ്യ ഗോത്രവര്‍ഗ വനിത കൂടിയാണ് ഒഡീഷയിലെ സന്താലി ഗോത്രത്തില്‍ പെട്ട ദ്രൗപതി മുര്‍മു. മുന്‍ രാഷ്ട്രപതി രാംനാഥ് കോവിന്ദാണ് കഴിഞ്ഞ അഞ്ച് വര്‍ഷമായി സ്വാതന്ത്ര്യ ദിനത്തോടനുബന്ധിച്ച് രാജ്യത്തെ അഭിസംബോധന ചെയ്തിരുന്നത്. എഴുപത്തിയഞ്ചാം സ്വാതന്ത്ര്യ ദിനത്തോടനുബന്ധിച്ച് നടത്തിയ അവസാന പ്രസംഗത്തില്‍, കോവിഡ് -19, ടോക്കിയോ ഒളിമ്പിക്സ്, ആത്മ നിര്‍ഭര്‍ ഭാരത്, ജമ്മു കശ്മീര്‍, ഗഗന്‍യാന്‍ മിഷന്‍, കാലാവസ്ഥാ വ്യതിയാനം, കോവിഡ് വാക്സിനേഷന്‍ എന്നിവയെ കുറിച്ചാണ് കോവിന്ദ് സംസാരിച്ചത്.
കേരളീയര്‍ക്ക് സ്വാതന്ത്ര്യ ദിനാശംസകള്‍ നേര്‍ന്ന് ഗവര്‍ണര്‍
എഴുപത്തി ആറാം സ്വാതന്ത്ര്യദിനം പ്രമാണിച്ച് ലോകമെമ്പാടുമുള്ള കേരളീയര്‍ക്ക് ആശംസ നേര്‍ന്ന് ഗവര്‍ണര്‍ ആരിഫ് മുഹമ്മദ് ഖാന്‍. ഏറ്റവും വലിയ ജനാധിപത്യ രാജ്യത്തിലെ പൗരന്മാര്‍ എന്ന നിലയില്‍ സ്വാതന്ത്ര്യത്തെയും സമത്വത്തെയും പരിപോഷിപ്പിച്ചും ഉന്നതമായ ജനാധിപത്യമൂല്യങ്ങള്‍ പാലിച്ചുകൊണ്ടും എല്ലാ പൗരര്‍ക്കും കൂടുതല്‍ അന്തസ്സാര്‍ന്ന ജീവിതം ഉറപ്പാക്കാന്‍ യത്‌നിക്കേണ്ടത് നമ്മുടെ കടമയാണെന്ന് അദ്ദേഹം പറഞ്ഞു.
ഭാരതീയര്‍ എന്ന നിലയിലുള്ള നമ്മുടെ ഓരോ പ്രവൃത്തിയും എല്ലാവരെയും ഉള്‍ക്കൊള്ളുന്ന ഉന്നത പുരോഗതിയിലേക്കും പൂര്‍ണ സ്വാശ്രയത്വത്തിലേക്കുമുള്ള ഭാരതത്തിന്റെ അമൃതയാത്രയ്ക്ക് ശക്തി പകരുന്നതാകട്ടെ. സ്വാതന്ത്ര്യത്തിനായി ജീവന്‍ ബലിയര്‍പ്പിച്ച ധീര ദേശാഭിമാനികളെ നമുക്ക് ആദരത്തോടെ ഓര്‍ക്കാമെന്നും ഗവര്‍ണര്‍ കൂട്ടിച്ചേര്‍ത്തു. പൂര്‍ണമായും മലയാളത്തിലായിരുന്നു ഗവര്‍ണറുടെ സ്വാതന്ത്ര്യദിന ആശംസ.
Content Highlights:'Freedom is the triumph of democracy'; Greetings President
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !