ദുബായ്: പാര്‍പ്പിട നിയമങ്ങള്‍ ലംഘിച്ച് താമസിക്കുന്നവരെ കണ്ടെത്തി നടപടി എടുക്കുന്നതിന്റെ ഭാഗമായുള്ള പരിശോധനകള്‍ ശക്തമാക്കി ദുബായ് മുനിസിപ്പാലിറ്റി. താമസ സൗകര്യവുമായി ബന്ധപ്പെട്ട് രാജ്യത്ത് നിലനില്‍ക്കുന്ന നിയമം പാലിക്കുന്നുവെന്ന് ഉറപ്പുവരുത്തുകയും അതുവഴി താമസക്കാരുടെ സുരക്ഷയും സൗകര്യവും ശക്തിപ്പെടുത്തുകയും ചെയ്യുകയെന്ന ലക്ഷ്യത്തോടെയാണ് നടപടി.
രജിസ്റ്റര്‍ ചെയ്യേണ്ടത് എങ്ങനെ?
ഇതിനായി ആദ്യം ദുബായ് റെസ്റ്റ് എന്ന മൊബൈല്‍ ആപ്പ് ഇന്‍സ്റ്റാള്‍ ചെയ്ത് ഓപ്പണ്‍ ചെയ്യണം. നിലവില്‍ അക്കൗണ്ടുള്ളവര്‍ ലോഗിന്‍ ചെയ്യണം. അല്ലാത്തവര്‍ രജിസ്റ്റര്‍ ചെയ്ത ശേഷം ലോഗിന്‍ ചെയ്യണം. തുടര്‍ന്ന് ഇന്‍ഡിവിഡ്വല്‍ ഓപ്ഷന്‍ തെരഞ്ഞെടുത്ത് യുഎഇ പാസ് ഉപയോഗിച്ചാണ് ലോഗിന്‍ ചെയ്യേണ്ടത്. യുഎഇ പാസ് ഉപയോഗിച്ച് ഒതന്റിക്കേറ്റ് ചെയ്ത ശേഷം ഡാഷ് ബോര്‍ഡില്‍ നിന്ന് തന്റെ ഉടമസ്ഥതയിലുള്ളതോ താമസിക്കുന്നതോ ആയ കെട്ടിടം തെരഞ്ഞെടുക്കണം. മാനേജ് കോഒക്യുപ്പന്റ് എന്നത് തെരഞ്ഞെടുത്ത് ചേര്‍ക്കാനുള്ളവരുടെ പേരുവിവരങ്ങള്‍ ചേര്‍ക്കുകയാണ് അടുത്ത പടി. താമസിക്കുന്നവരുടെ എമിറേറ്റ്സ് ഐഡി, ജനന തീയതി എന്നിവ നല്‍കി വെരിഫൈ ബട്ടന്‍ അമര്‍ത്തണം. ഈ രീതിയില്‍ കെട്ടിടത്തില്‍ താമസിക്കുന്ന മുഴുവന്‍ പേരുടെയും വിവരങ്ങള്‍ അപ്ഡേറ്റ് ചെയ്യാം. നേരത്തേ രജിസ്റ്റര്‍ ചെയ്ത ഒരാളെ നീക്കം ചെയ്യാനാണെങ്കില്‍ ഡിലീറ്റ് ഐക്കല്‍ സെലക്ട് ചെയ്ത് സബ്മിറ്റ് ബട്ടന്‍ ക്ലിക്ക് ചെയ്താല്‍ മതിയാവും.
ഈ വര്‍ഷം നടത്തിയത് ഇരുപതിനായിരത്തോളം പരിശോധനകള്‍
നിയമം അനുവദിക്കുന്നതിലും കൂടുതല്‍ ആളുകളോ കുടുംബങ്ങളോ ഒരു താമസ സ്ഥലത്ത് കഴിയുന്നുണ്ടോ എന്നും കുടുംബങ്ങള്‍ക്ക് മാത്രമായി നിശ്ചയിക്കപ്പെട്ട റെസിഡന്‍ഷ്യല്‍ പ്രദേശങ്ങളില്‍ കുടുംബത്തോടൊപ്പമല്ലാതെ തനിച്ച് താമസിക്കുന്നവര്‍ക്കായി വീടുകള്‍ അനുവദിച്ചിട്ടുണ്ടോ എന്നീ കാര്യങ്ങളാണ് പ്രധാനമായും മുനിസിപ്പാലിറ്റി അധികൃതര്‍ പരിശോധിക്കുന്നത്. ഈ വര്‍ഷം തുടക്കം മുതല്‍ ഇതുവരെ 19,837 ഫീല്‍ഡ് വിസിറ്റുകള്‍ ഇതുമായി ബന്ധപ്പെട്ട് മുനിസിപ്പാലിറ്റി പൂര്‍ത്തിയാക്കിയതായി അധികൃതര്‍ അറിയിച്ചു. എല്ലാ ദിവസവും രാവിലെയും വൈകുന്നേരങ്ങളിലുമാണ് മറ്റു സര്‍ക്കാര്‍ ഏജന്‍സികളുടെ കൂടി സഹായത്തോടെ താമസ കേന്ദ്രങ്ങളില്‍ സംയുക്ത പരിശോധനകള്‍ നടക്കുന്നത്.
പരിശോധനകള്‍ ഗുണം ചെയ്തതായി അധികൃതര്‍
ഈ പരിശോധനകള്‍ രാജ്യത്തെ താമസ ഇടങ്ങളില്‍ വലിയ മാറ്റങ്ങള്‍ക്ക് കാരണമായതായി അധികൃതര്‍ വിലയിരുത്തി. പരിശോധനകളഇല്‍ നിയമം ലംഘിക്കുന്നതായി കണ്ടെത്തിയവര്‍ക്കെതിരേ നിയമ നടപടികള്‍ സ്വീകരിച്ചതിന്റെ ഫലമായി താമസ കേന്ദ്രങ്ങളില്‍ ഏതാണ്ടെല്ലാ ഇടങ്ങളിലും നിയമങ്ങളും ചട്ടങ്ങളും പാലിക്കപ്പെടുന്നതായും അധികൃതര്‍ വ്യക്തമാക്കി. ദുബായില്‍ വില്ലകളിലും അപാര്‍ട്ട്‌മെന്റുകളിലും എത്ര പേര്‍ക്കും എത്ര കുടുംബങ്ങള്‍ക്കും താമസിക്കാമെന്ന് നിയമം കൃത്യമായി നിശ്ചയിച്ചുനല്‍കിയിട്ടുണ്ട്. ഈ എണ്ണം പാലിക്കപ്പെടുന്നുണ്ടോ എന്ന കാര്യമാണ് അധികൃതര്‍ പ്രധാനമായും അന്വേഷിക്കുന്നത്.
നിയമം ലംഘിക്കുന്നവര്‍ക്ക് കടുത്ത ശിക്ഷ
വാടകയ്ക്ക് താമസിക്കുന്നവര്‍ കെട്ടിട ഉടമയുടെ അനുമതിയില്ലാതെ അപ്പാര്‍ട്ട്‌മെന്റുകള്‍ മറ്റുള്ളവര്‍ക്കായി പകുത്തു നല്‍കുന്നതും നിയമ പ്രകാരം ശിക്ഷാര്‍ഹമാണ്. ഇത്തരം നിയമ ലംഘനങ്ങള്‍ക്ക് പിടിക്കപ്പെട്ടാല്‍ വാടകക്കാരനും ഇയാള്‍ അനധികൃതമായി താമസിപ്പിച്ചവരും കെട്ടിടം ഒഴിഞ്ഞുകൊടുക്കേണ്ടിവരും. നിയമലംഘകരില്‍ നിന്ന് വന്‍തുക പിഴയും ഈടാക്കും. അബൂദാബിയില്‍ ഈ രീതിയില്‍ കെട്ടിട ഉടമ അറിയാതെ വാടകയ്‌ക്കെടുത്ത വീട് നാലു കുടുംബങ്ങള്‍ക്കായി പകുത്ത് നല്‍കിയ താമസക്കാരന് കോടതി മൂന്നു ലക്ഷം ദിര്‍ഹം പിഴ ചുമത്തിയിരുന്നു. ഈ തുക കെട്ടിട ഉമയ്ക്ക് നഷ്ടപരിഹാരമായി നല്‍കാനാണ് കോടതി ഉത്തരവിട്ടത്. ഇങ്ങനെ നിയമ വിരുദ്ധമായി താമസ ഇടങ്ങള്‍ പാര്‍ട്ടീഷന്‍ ചെയ്യുന്നത് തീപ്പിടിത്തം പോലുള്ളവയ്ക്ക് കാരണമാവുകയും തീപ്പിടുത്തമുണ്ടായാല്‍ രക്ഷപ്പെടാനുള്ള വഴികള്‍ അടയ്ക്കപ്പെടുകയും ചെയ്യുന്നതായി അധികൃതര്‍ ചൂണ്ടിക്കാട്ടി. ഇത്തരം കേസുകളില്‍ കെട്ടിടത്തിന്റെ വൈദ്യുതി, വെള്ളം ഉള്‍പ്പെടെയുള്ള കണക്ഷനുകള്‍ വിച്ഛേദിക്കുമെന്നും അധികൃതര്‍ അറിയിച്ചു.
ഫാമിലി ഏരിയകളില്‍ ബാച്ചിലേഴ്‌സ് പാടില്ല
ഫാമിലി ഏരിയകളില്‍ ബാച്ചിലേഴ്‌സ് പാടില്ല
കുടുംബങ്ങളെ മാത്രം താമസിപ്പിക്കാന്‍ അനുമതിയുള്ള സ്ഥലങ്ങളില്‍ ബാച്ചിലേഴ്‌സിനെ താമസിപ്പിക്കുന്നതും നിയമവിരുദ്ധമാണ്. ഇതുമായി ബന്ധപ്പെട്ട് നേരത്തേ നടന്ന പരിശോധനകളില്‍ ഷാര്‍ജ പോലുള്ള മേഖലയില്‍ നിന്ന് ആയിരക്കണക്കിന് പേരെ ഒഴിപ്പിച്ചിരുന്നു. ഇങ്ങനെ ഫാമിലി ഏരിയയില്‍ ബാച്ചിലര്‍മാര്‍ക്ക് വീട് അനുവദിക്കുന്ന കെട്ടിട ഉമടകള്‍ക്കെതിരേയും നടപടിയുണ്ടാവുമെന്ന് അധികൃതര്‍ മുന്നറിയിപ്പ് നല്‍കി. ഇത്തരം നിയമ ലംഘനങ്ങള്‍ ശ്രദ്ധയില്‍ പെടുന്നവര്‍ 800900 എന്ന ടോള്‍ ഫ്രീ നമ്പറില്‍ വിളിച്ച് അധികൃതരെ വിവരം അറിയിക്കണമെന്നും മുനിസിപ്പാലിറ്റി ആവശ്യപ്പെട്ടു.
താമസക്കാരുടെ പേരുവിവരങ്ങള്‍ രജിസ്റ്റര്‍ ചെയ്യണം
അതിനിടെ, നിയമ ലംഘനങ്ങള്‍ ഇല്ലെന്ന് ഉറപ്പുവരുത്തുന്നതിന്റെ ഭാഗമായി കെട്ടിടങ്ങളിലെ താമസക്കാരുടെ വിവരങ്ങള്‍ എത്രയും വേഗം രജിസ്റ്റര്‍ ചെയ്യാന്‍ രാജ്യത്തെ ക്ടെടിട ഉടമകള്‍, ഡെവലപ്പര്‍മാര്‍, പ്രോപ്പര്‍ട്ടി മാനേജ്മെന്റ് കമ്പനികള്‍, താമസക്കാര്‍ തുടങ്ങിയവര്‍ക്ക് ദുബായ് ലാന്റ് ഡിപ്പാര്‍ട്ട്മെന്റ് കഴിഞ്ഞ ദിവസം നിര്‍ദ്ദേശം നല്‍കിയിരുന്നു. സ്വന്തം കെട്ടിടമാണെങ്കിലും ലീസിന് എടുത്തതാണെങ്കിലും വിവരങ്ങള്‍ രണ്ടാഴ്ചയ്ക്കകം തന്നെ രജിസ്റ്റര്‍ ചെയ്യണമെന്നാണ് സെപ്റ്റംബര്‍ 23ന് നല്‍കിയിരിക്കുന്ന നിര്‍ദ്ദേശം. ദുബായ് റെസ്റ്റ് (DUBAI REST) എന്ന മൊബൈല്‍ ആപ്പ് വഴിയാണ് രജിസ്റ്റര്‍ ചെയ്യേണ്ടത്. ഇങ്ങനെ രജിസ്റ്റര്‍ ചെയ്താലുടന്‍ താമസക്കാരുടെ വിവരങ്ങള്‍ ടെനന്‍സി കോണ്‍ട്രാക്റ്റില്‍ അപ്ഡേറ്റ് ആവും.
Content Highlights: Dubai Municipality conducts extensive inspections to find violations in residential areas
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !