ഡോളറിനെതിരെ രൂപയുടെ മൂല്യം ഉയര്‍ന്നു

വിപണിയില്‍ ഇന്ന് യുഎസ് ഡോളറിനെതിരെ രൂപയുടെ മൂല്യം 27 പൈസ ഉയര്‍ന്ന് 81.84 എന്ന നിലയിലെത്തി. ഇത് വിദേശ വിപണിയിലെ അമേരിക്കന്‍ കറന്‍സിയുടെ ദൗര്‍ബല്യമാണ് വ്യക്തമാക്കുന്നത്.

ഇന്നലെ 82.11 എന്ന നിലയിലായിരുന്നു യുഎസ് കറന്‍സിയ്‌ക്കെതിരെ രൂപയുടെ മൂല്യം.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഫ്യൂച്ചറുകള്‍ ബാരലിന് 0.27 ശതമാനം ഇടിഞ്ഞ് 87.09 ഡോളറിലെത്തി. ആഭ്യന്തര വിപണിയില്‍, ബിഎസ്‌ഇ സെന്‍സെക്സ് 38.23 പോയിന്റ് അല്ലെങ്കില്‍ 0.06 ശതമാനം ഉയര്‍ന്ന് 60,431.00 ലും എന്‍എസ്‌ഇ നിഫ്റ്റി 15.60 പോയിന്റ് അല്ലെങ്കില്‍ 0.09 ശതമാനം ഉയര്‍ന്ന് 17,828 ലും അവസാനിച്ചു.

ഇന്നത്തെ വ്യാപാര സെഷനില്‍, ഡോളറിനെതിരെ രൂപയുടെ മൂല്യം 81.83 എന്ന ഉയര്‍ന്ന നിലയിലും 82.01 എന്ന താഴ്ന്ന നിലയിലും എത്തിയിരുന്നു. ഡോളര്‍ സൂചിക 0.23 ശതമാനം ഇടിഞ്ഞ് 101.26 ആയി.

ഇന്ത്യയുടെ വ്യാവസായിക ഉല്‍പ്പാദന വളര്‍ച്ച 2023 ജനുവരിയിലെ 5.5 ശതമാനത്തില്‍ നിന്ന് ഫെബ്രുവരിയില്‍ 5.6 ശതമാനമായി ഉയര്‍ന്നു, പ്രധാനമായും വൈദ്യുതി, ഖനനം, ഉല്‍പ്പാദനം എന്നീ മേഖലകളിലെ മികച്ച പ്രകടനം വളര്‍ച്ചയ്ക്ക് സഹായകമായി.

ഇന്ത്യയുടെ ഉപഭോക്തൃ വില സൂചിക (സി‌പി‌ഐ) പണപ്പെരുപ്പം മാര്‍ച്ചില്‍ 15 മാസത്തെ ഏറ്റവും താഴ്ന്ന നിരക്കായ 5.66 ശതമാനത്തിത്തിലെത്തി. നാഷണല്‍ സ്റ്റാറ്റിസ്റ്റിക്കല്‍ ഓഫീസില്‍ (എന്‍‌എസ്‌ഒ) നിന്നുള്ള ഡാറ്റ പ്രകാരം ഫെബ്രുവരിയിലെ 6.44 ശതമാനത്തില്‍ നിന്നും വലിയ കുറവാണു മാര്‍ച്ചില്‍ ഉണ്ടായിരിക്കുന്നത്. മുന്‍ വര്‍ഷം ഇതേ കാലയളവില്‍ 6.95 ശതമാനമായിരുന്നു രാജ്യത്തെ റീടൈല്‍ പണപ്പെരുപ്പം.

പച്ചക്കറി വില കുറഞ്ഞതോടെ ഭക്ഷ്യവസ്തുക്കളുടെ വില 4.79 ശതമാനമായി കുറഞ്ഞതാണ് പണപ്പെരുപ്പം കുറയാന്‍ പ്രധാന കാരണം. നിലവിലെ പണപ്പെരുപ്പം റിസര്‍വ് ബാങ്ക് ഓഫ് ഇന്ത്യയുടെ (ആര്‍ബിഐ) പരിധിക്കുള്ളിലാണ്, ഇത് 2 ശതമാനം മുതല്‍ 6 ശതമാനം വരെയാണ് ആര്‍ബിഐയുടെ പരിധി.

Content Highlights: Mediavisionlive.in

ഏറ്റവും പുതിയ വാർത്തകൾ: