ജില്ലാ കളക്ടറുടെ നേതൃത്വത്തില് സ്ഥിതിഗതികള് വിലയിരുത്തി
കോഴിക്കോട് ജില്ലയില് നിപ വൈറസ് സ്ഥിരീകരിച്ച സാഹചര്യത്തില് സമീപ ജില്ലയായ മലപ്പുറത്തും പൊതുജനങ്ങള് ജാഗ്രത പുലര്ത്തണമെന്ന് ജില്ലാ കളക്ടര് വി.ആര് പ്രേംകുമാര്, ജില്ലാ മെഡിക്കല് ഓഫീസര് ഡോ. ആര്. രേണുക എന്നിവര് അറിയിച്ചു. നിലവില് മലപ്പുറം ജില്ലയില് നിന്നുള്ള ആരും സമ്പര്ക്ക പട്ടികയില് ഇല്ലെങ്കിലും കരുതല് ആവശ്യമാണ്. മഞ്ചേരി മെഡിക്കല് കോളേജ് ആശുപത്രിയില് പനിയും അപസ്മാര ലക്ഷണവും കാണിച്ച ഒരാളെ നിലവില് ഐസൊലേഷനില് നിരീക്ഷിച്ചു വരികയാണ്. സമ്പര്ക്ക പട്ടികയില് ഇല്ലെങ്കിലും സാമ്പിള് ശേഖരിച്ച് നിപ വൈറസ് പരിശോധനയ്ക്ക് അയച്ചിട്ടുണ്ട്.
ജില്ലയിലെ സ്ഥിതിഗതികള് വിലയിരുത്തുന്നതിനായി ജില്ലാ കളക്ടര് വി.ആര് പ്രേം കുമാറിന്റെ നേതൃത്വത്തില് വിവിധ വകുപ്പുകളുടെ ജില്ലാതല മേധാവികളുടെ യോഗം ചേരുകയും അടിയന്തര സാഹചര്യങ്ങള് നേരിടുന്നതിന് കര്മ്മ പദ്ധതി തയ്യാറാക്കുകയും ചെയ്തു. മുന്കരുതല് നടപടികള്ക്കും പ്രതിരോധ പ്രവര്ത്തനങ്ങള്ക്കും മുഴുവന് വകുപ്പുകളുടെയും ഏകോപനം ഉറപ്പാക്കാന് ജില്ലാ കളക്ടര് നിര്ദ്ദേശം നല്കി. യോഗത്തില് ആരോഗ്യവകുപ്പിനെ കൂടാതെ മഞ്ചേരി മെഡിക്കല് കോളേജ്, തദ്ദേശ സ്വയംഭരണം, മൃഗസംരക്ഷണം, വിദ്യാഭ്യാസം, ഇന്ഫര്മേഷന് പബ്ലിക് റിലേഷന്സ്, പോലീസ്, ആയുഷ്, ഹോമിയോ, വനിതാ ശിശു വികസനം, ഐ സി ഡി എസ് തുടങ്ങിയവയുടെ മേധാവികള് പങ്കെടുത്തു.
ജില്ലാ മെഡിക്കല് ഓഫീസില് പ്രത്യേക നിപ കണ്ട്രോള് സെല് പ്രവര്ത്തനമാരംഭിച്ചിട്ടുണ്ട്. നമ്പര്- 0483 2734066. അടിയന്തിര സാഹചര്യം നേരിടുന്നതിനായി മഞ്ചേരി മെഡിക്കല് കോളേജ് ആശുപത്രിയില് ഐസൊലേഷന് വാര്ഡുകള് ആരംഭിക്കുകയും 108 ആംബുലന്സ് സേവനങ്ങള് ഉറപ്പ് വരുത്തുകയും ചെയ്തു.
Content Highlights: District ready for Nipah virus prevention; Caution advised
ഏറ്റവും പുതിയ വാർത്തകൾ:
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !