തേഞ്ഞിപ്പലം: കാലിക്കട്ട് സർവകലാശാല സിന്തറ്റിക് സ്റ്റേഡിയത്തിൽ ജില്ലാ അത്ലറ്റിക് അസോസിയേഷൻ രണ്ട് ദിവസങ്ങളിലായി സംഘടിപ്പിച്ച നാൽപ്പത്തൊൻപതാമത് മലപ്പുറം ജില്ലാ അത്ല്റ്റിക്സ് മീറ്റിൽ 41 സ്വർണവും 36 വെള്ളിയും 19 വെങ്കലവുമടക്കം 617 പോയിന്റുകൾ കരസ്ഥമാക്കി കടകശേരി ഐഡിയൽ ഇംഗ്ലീഷ് സ്കൂൾ തുടർച്ചയായ പതിനൊന്നാം തവണയും ചാന്പ്യൻമാരായി.
31 സ്വർണം 20 വെള്ളി 31 വെങ്കലം എന്നിവ നേടി 539.5 പോയിന്റുമായി കെഎച്ച്എംഎച്ച്എസ് സ്കൂൾ ആലത്തിയൂർ രണ്ടാ സ്ഥാനവും നേടി.
നാല് സ്വർണവും 10 വെള്ളിയും 12 വെങ്കലവുമായി 168 പോയിന്റുമായി സിഎംഎച്ച് സ്കൂൾ പൂക്കളത്തൂർ മൂന്നാം സ്ഥാനവും കരസ്ഥമാക്കി. 162 പോയന്റുമായി കഐച്ച്എംഎച്ച് എസ്.വാളകുളം നാലാം സ്ഥാനത്തും 146 പോയന്റുമായി സെന്റ് മേരീസ് എച്ച്എസ് സ്കൂൾ പരിയാപുരം അഞ്ചാം സ്ഥാനത്തുമെത്തി.
സമാപന ചടങ്ങിൽ ജില്ലാ അത്ലറ്റിക്സ് അസോസിയേഷൻ പ്രസിഡന്റ് ഡോ.സക്കീർ ഹുസൈൻ, വൈസ് പ്രസിഡന്റ് മജീദ് ഐഡിയൽ, സംസ്ഥാന കൗണ്സിലർ പ്രഫ.വേലായുധൻ കുട്ടി എന്നിവർ സമ്മാനദാനം നിർവഹിച്ചു. സെക്രട്ടറി കെ.കെ.രവീന്ദ്രൻ, ട്രഷറർ അബ്ദുൾഖാദർ, മുഹമ്മദ് ഖാസിം, റിഷികേശ് കുമാർ സൈഫുദ്ദീൻ, ഷാഫി അമ്മായത്ത് തുടങ്ങിയവർ പ്രസംഗിച്ചു.
