തിരുവനന്തപുരം: മറഡോണയുടെ മരണം കേരളത്തിലെ ഫുട്ബോള് ആരാധകരെ ഉലച്ചിരിക്കുകയാണ്. ഹൃദയാഘാതത്തെ തുടര്ന്നാണ് ബുധനാഴ്ച രാത്രി അദ്ദേഹം വിടപറഞ്ഞത്. തലച്ചോറില് രക്തസ്രാവത്തെ തുടര്ന്ന് മറഡോണ ചികിത്സയിലായിരുന്നു. മറഡോണയുടെ മരണത്തില് സംസ്ഥാനത്ത് രണ്ട് ദിവസത്തെ ദു:ഖാചരണം പ്രഖ്യാപിച്ചിരിക്കുകയാണ് എന്ന് കായിക വകുപ്പ് മന്ത്രി ഇപി ജയരാജന് അറിയിച്ചു.
ഫുട്ബോള് ഇതിഹാസം ഡീഗോ മറഡോണയുടെ വേര്പാട് ലോകമെങ്ങുമുള്ള ഫുട്ബോള് ആരാധകരെ കടുത്ത ദുഃഖത്തില് ആഴ്ത്തിയിരിക്കുകയാണെന്ന് മന്ത്രി വ്യക്തമാക്കി. കേരളത്തിലും ലക്ഷക്കണക്കിന് ആരാധകര് ആ വേര്പാട് വിശ്വസിക്കാന് കഴിയാതെ വിങ്ങലിലാണ്. ഈ സാഹചര്യത്തില് കേരള കായികലോകത്തില് നവംബര് 26, 27 തിയതികളില് ദുഃഖാചരണത്തിന് കായിക വകുപ്പ് തീരുമാനിച്ചു. കായിക മേഖലയൊന്നാകെ ദുഃഖാചരണത്തില് പങ്കുചേരണമെന്നും മന്ത്രി ഇപി ജയരാജന് അഭ്യര്ത്ഥിച്ചു.
മറഡോണയുടെ മരണത്തില് അനുശോചിച്ച് മുഖ്യമന്ത്രി പിണറായി വിജയനടക്കം രംഗത്ത് വന്നിരുന്നു. മുഖ്യമന്ത്രിയുടെ അനുശോചന കുറിപ്പ്: ഇതിഹാസ ഫുട്ബോള് താരം മാറഡോണയുടെ വേര്പാടില് ലോകമെങ്ങുമുള്ള ഫുട്ബോള് പ്രേമികള്ക്കൊപ്പം കേരള ജനതയും ദുഃഖിക്കുന്നു. ലോകത്തെ ഏറ്റവും സുന്ദരമായ ഗെയിമാണ് ഫുട്ബോള്. ആ കലയിലെ ഏറ്റവും ജനപ്രിയനായ താരമായിരുന്നു മാറഡോണ. അര്ജന്റീനക്ക് പുറത്ത് മാറഡോണക്ക് ഇത്രയധികം ആരാധകരുള്ളത് ഒരു പക്ഷെ കേരളത്തിലായിരിക്കും. 1986 അര്ജന്റീന ലോകകപ്പ് ഉയര്ത്തിയതുമുതല് കേരളത്തിലെ ഫുട്ബോള് പ്രേമികളുടെ മനസ്സില് ആ മാന്ത്രിക താരത്തിന് വലിയ സ്ഥാനമുണ്ട്. ലോകകപ്പ് ലോകത്തിലെ ഏത് കോണില് നടക്കുമ്ബോഴും അദ്ദേഹത്തിന്റെ ചിത്രങ്ങള് ഏറ്റവുമധികം ഉയരുന്നത് ഈ കൊച്ചുകേരളത്തിലാണ്.
1986 ലോകകപ്പില് അഞ്ച് ഇംഗ്ലീഷ് താരങ്ങളെയും വിഖ്യാത ഗോളി പീറ്റര് ഷില്ട്ടനെയും മറികടന്ന് മാറഡോണ നേടിയ ഗോള് ലോകം ദര്ശിച്ച ഏറ്റവും സുന്ദരവും സമര്ത്ഥവുമായ ഗോളാണ്. അത് ഏറെക്കാലം അങ്ങിനെതന്നെ നിലനില്ക്കും. അര്ജന്റീന ലോകഫുട്ബോളിലെ പ്രബലര് ആണെങ്കിലും ആ രാജ്യത്തെ ഫുട്ബോളിന്റെ നെറുകയില് എത്തിച്ചത് മാറഡോണയാണ്. ക്യൂബയുടെയും ഫിദല് കാസ്ട്രോയുടെയും അടുത്ത സുഹൃത്തായിരുന്നു മാറഡോണ എന്നത് അദ്ദേഹത്തിന്റെ സാമ്രാജ്യത്വ വിരുദ്ധ നിലപാടിന്റെ തെളിവാണ്. ആ മഹാനായ ഫുട്ബോളര് എന്നും സോഷ്യലിസ്റ്റ് പക്ഷത്ത് ധീരമായി നിലകൊണ്ടു'.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയ വിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !