ന്യൂഡല്ഹി: ഒരു രാജ്യം ഒരു റേഷന് കാര്ഡ് പദ്ധതി ജൂലായ് 31നകം നടപ്പാക്കണമെന്ന് സുപ്രീംകോടതി. കുടിയേറ്റ തൊഴിലാളികളുടെ കണക്കെടുപ്പും ഇക്കാലയളവില് തന്നെ പൂര്ത്തിയാക്കണം. കൊവിഡ് പ്രതിസന്ധി പൂര്ണമായി ഒഴിയുന്നത് വരെ സമൂഹ അടുക്കള വഴി ഭക്ഷണം വിതരണം ചെയ്യണമെന്നും സുപ്രീംകോടതി കേന്ദ്ര, സംസ്ഥാന സര്ക്കാരുകളോട് നിര്ദേശിച്ചു.
കുടിയേറ്റ തൊഴിലാളികള് എവിടെയാണ് താമസിക്കുന്നത് അവിടെ ഭക്ഷ്യധാന്യം ലഭിക്കുന്നതിനുള്ള നടപടികള് സ്വീകരിക്കണം. നിര്ദേശങ്ങള് കേന്ദ്ര, സംസ്ഥാന സര്ക്കാരുകള് കര്ശനമായി പാലിക്കണമെന്നും സുപ്രീംകോടതി ഓര്മ്മിപ്പിച്ചു. കൊവിഡ് വ്യാപനത്തെ തുടര്ന്ന് പ്രതിസന്ധിയിലായ കുടിയേറ്റ തൊഴിലാളികളുടെ പ്രശ്നം പരിഹരിക്കുന്നതിന് സുപ്രീംകോടതി സ്വമേധയാ എടുത്ത കേസിലാണ് നിര്ദേശം.
കുടിയേറ്റ തൊഴിലാളികളുടെ ക്ഷേമത്തിനായി ആറിന നിര്ദേശങ്ങളാണ് സുപ്രീംകോടതി നിര്ദേശിച്ചത്. കുടിയേറ്റ തൊഴിലാളികളുടെ വിവരശേഖരണത്തിനായി രൂപം നല്കിയ ദേശീയ പോര്ട്ടലില് ജൂലായ് 31നകം രജിസ്ട്രേഷന് നടപടികള് പൂര്ത്തിയാക്കണം. കുടിയേറ്റ തൊഴിലാളികള്ക്ക് ഭക്ഷ്യധാന്യം ലഭിക്കുന്നുണ്ട് എന്ന് കേന്ദ്രസര്ക്കാര് ഉറപ്പാക്കണം. സംസ്ഥാന സര്ക്കാരുകള് ഇതിനായി പ്രത്യേക പദ്ധതി തയ്യാറാക്കണം. ഭക്ഷ്യധാന്യത്തിന്റെ ലഭ്യത കുറവ് കണ്ടെത്തിയാല് ക്വാട്ട വര്ദ്ധിപ്പിക്കാന് കേന്ദ്രസര്ക്കാര് നടപടി സ്വീകരിക്കണമെന്നും കോടതി നിര്ദേശിച്ചു.
കുടിയേറ്റ തൊഴിലാളികള് പട്ടിണി കിടക്കുന്നില്ല എന്ന് ഉറപ്പുവരുത്താന് സമൂഹ അടുക്കള സ്ഥാപിക്കണം. കൊവിഡ് പ്രതിസന്ധി തീരുന്നത് വരെ സമൂഹ അടുക്കള വഴിയുള്ള ഭക്ഷ്യവിതരണം തുടരണമെന്നും സുപ്രീംകോടതി നിര്ദേശത്തില് വ്യക്തമാക്കുന്നു.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയവിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !