ന്യൂഡല്ഹി: നിയമസഭാ കയ്യാങ്കളിക്കേസില് സംസ്ഥാന സര്ക്കാരിന് വന് തിരിച്ചടി. വിദ്യാഭ്യാസ മന്ത്രി വി. ശിവന്കുട്ടി ഉള്പ്പെടെ കേസിലെ ആറുപ്രതികളും വിചാരണ നേരിടണമെന്ന് ജസ്റ്റിസ് ഡി.വൈ. ചന്ദ്രചൂഡ് അധ്യക്ഷനായ രണ്ടംഗ ബെഞ്ച് വിധിച്ചു. കേസ് പിന്വലിക്കണമെന്നാവശ്യപ്പെട്ട് സംസ്ഥാന സര്ക്കാര് നല്കിയ അപേക്ഷ തള്ളിക്കൊണ്ടാണ് സുപ്രീം കോടതി വിധി.
സഭയുടെ പരിരക്ഷ ക്രിമിനല് കുറ്റത്തില്നിന്നുള്ള പരിരക്ഷയല്ലെന്ന് ജസ്റ്റിസ് ചന്ദ്രചൂഡ് വിധിപ്രസ്താവത്തില് വ്യക്തമാക്കി. പരിരക്ഷ ജനപ്രതിനിധികള് എന്ന നിലയില് മാത്രമാണ്. 184-ാം അനുച്ഛേദം തെറ്റായി വ്യാഖ്യാനിച്ചാണ് ഹര്ജി സമര്പ്പിച്ചിരിക്കുന്നതെന്നും അദ്ദേഹം പറഞ്ഞു. കേസ് പിന്വലിക്കാനുള്ള സര്ക്കാര് നടപടി തെറ്റാണ്. എം.എല്.എമാരുടെ നടപടികള് ഭരണഘടനയുടെ അതിര്വരമ്പുകള് ലംഘിച്ചു. അതിന് ജനപ്രതിനിധികളുടെ പരിപക്ഷ പ്രയോജനപ്പെടുത്താനാവില്ല. പൊതുമുതല് നശിപ്പിക്കുന്നത് അഭിപ്രായ സ്വാതന്ത്ര്യത്തിന്റെ പരിധിയില് ഉള്പ്പെടുത്താനാവില്ലെന്നും കോടതി പറഞ്ഞു.
സംസ്ഥാനസര്ക്കാരിനുപുറമേ കേസില് പ്രതികളായ വി. ശിവന്കുട്ടി, ഇ.പി. ജയരാജന്, കെ.ടി. ജലീല്, കെ. കുഞ്ഞമ്മദ്, സി.കെ. സദാശിവന്, കെ. അജിത് എന്നിവരും സുപ്രീംകോടതിയെ സമീപിച്ചിരുന്നു. 2015 മാര്ച്ച് 13-നാണ് വിവാദമായ നിയമസഭാ കയ്യാങ്കളി നടക്കുന്നത്. ബാര് കോഴ വിവാദത്തില് ഉള്പ്പെട്ട അന്നത്തെ ധനമന്ത്രി കെ.എം. മാണിയെ ബജറ്റ് അവതരിപ്പിക്കാന് അനുവദിക്കില്ലെന്ന എല്.ഡി.എഫ്. എം.എല്.എമാരുടെ നിലപാടാണ് കയ്യാങ്കളിയിലേക്ക് നയിച്ചത്. അന്ന് യുഡിഎഫില് ആയിരുന്ന കേരള കോണ്ഗ്രസ് മാണി വിഭാഗം ഇന്ന് എല്ഡിഎഫിന്റെ ഭാഗമാണ്.
കയ്യാങ്കളി നടത്തിയ എം.എല്.എ.മാര്ക്കെതിരേ ക്രിമിനല് നടപടിച്ചട്ടത്തിലെ 321-ാം വകുപ്പ് പ്രകാരം രജിസ്റ്റര്ചെയ്ത കേസ് റദ്ദാക്കാന് തിരുവനന്തപുരം ചീഫ് ജുഡീഷ്യല് മജിസ്ട്രേറ്റ് കോടതി വിസമ്മതിച്ചിരുന്നു. ഇതിനെതിരേ സംസ്ഥാനസര്ക്കാര് നല്കിയ ഹര്ജി ഹൈക്കോടതി തള്ളിയതിനെത്തുടര്ന്നാണ് സുപ്രീംകോടതിയിലെത്തിയത്.
| ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയവിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക ! |
|---|
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !