കൊച്ചി: കളമശ്ശേരി ബസ് കത്തിക്കല് കേസില് മൂന്ന് പ്രതികള്ക്ക് തടവ് ശിക്ഷ. തടിയന്റവിട നസീര്, സാബിര് എന്നീ പ്രതികള്ക്ക് ഏഴുവര്ഷവും താജുദ്ദീന് 6 വര്ഷം തടവും പിഴയുമാണ് ശിക്ഷ.
കൊച്ചി എന്.ഐ.എ കോടതിയാണ് ശിക്ഷ വിധിച്ചത്. തടിയന്റവിട നസീറിനും സാബിറിനും 1.75000 രൂപയും താജുദ്ദീന് 1, 10000 രൂപയും പിഴ ചുമത്തിയിട്ടുണ്ട്. വിചാരണ പൂര്ത്തിയാക്കാതെയാണ് മൂന്ന് പ്രതികള്ക്ക് കോടതി ഇന്ന് ശിക്ഷ വിധിച്ചത്.
എന്.ഐ.എ ചുമത്തിയ കുറ്റങ്ങള് സമ്മതിക്കുന്നതായി പ്രതികള് കോടതിയെ അറിയിച്ച പശ്ചാത്തലത്തിലാണിത്. നിലവിലെ റിമാന്ഡ് കാലാവധി ശിക്ഷാ കാലാവധിയായി കണക്കാക്കുമെന്നാണ് സൂചന. അബ്ദുല് നാസര് മദനിയുടെ ഭാര്യ സൂഫിയ മഅ്ദനി ഉള്പ്പെടെ കേസില് 13 പ്രതികളുണ്ട്. ഇതില് അഞ്ചാം പ്രതി അനൂപ് കുറ്റസമ്മതം നടത്തിയതിനെ തുടര്ന്ന് നേരത്തെ ശിക്ഷ വിധിച്ചിരുന്നു. കുറ്റം സമ്മതിക്കാത്ത പ്രതികളുടെ വിചാരണ ഉടന് ആരംഭിക്കും.
2005 സെപ്തംബര് 9 നാണ് കേസിനാസ്പദമായ സംഭവം. എറണാകുളം കെ.എസ്ആര്.ടി.സി ബസ് സ്റ്റാന്ഡില് നിന്ന് സേലത്തേക്ക് പോകുന്ന തമിഴ്നാട് ട്രാന്സ്പോര്ട്ട് ബസ് ആണ് രാത്രി 9.30ന് പ്രതികള് തോക്കുചൂണ്ടി ഭീഷണിപ്പെടുത്തി തട്ടിയെടുത്തത്. യാത്രക്കാരെ ഇറക്കിവിട്ട ശേഷം ബസ് പെട്രോളൊഴിച്ച് തീ കൊളുത്തുകയായിരുന്നു. കോയമ്ബത്തൂര് സ്ഫോടനകേസില് ജയിലില് കഴിയുന്ന പി.ഡി.പി നേതാവ് അബ്ദുള് നാസര് മഅ്ദനിയെ ജയിലില്നിന്നും മോചിപ്പിക്കണമെന്നായിരുന്നു ആവശ്യം. തടിയന്റവിട നസീറാണ് കേസിലെ ഒന്നാം പ്രതി. 2010 ഡിസംബറിലാണ് എന്.ഐ.എ കുറ്റപത്രം സമര്പ്പിച്ചത്.
Content Highlights: Kalamassery bus burning case; Jail sentence for three accused including Tadiyanthavida Naseer
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !