മലയാള സിനിമയിലെ ആദ്യ ₹300 കോടി ചിത്രം എന്ന റെക്കോർഡ് സ്വന്തമാക്കിയ 'ലോക: ചാപ്റ്റർ വൺ - ചന്ദ്ര' ഉടൻ ഒ.ടി.ടി.യിലേക്ക് എത്തുന്നു. തിയേറ്ററുകളിൽ വലിയ വിജയം നേടിയ ചിത്രം അധികം വൈകാതെ സ്ട്രീമിങ് പ്ലാറ്റ്‌ഫോമുകളിൽ ലഭ്യമാകും. ദുൽഖർ സൽമാൻ്റെ വേഫെറർ ഫിലിംസ് നിർമ്മിച്ച ഈ ചിത്രം റിലീസ് ചെയ്ത് 45 ദിവസങ്ങൾ കൊണ്ടാണ് 300 കോടി കളക്ഷൻ നേടിയത്. ഡൊമിനിക് അരുൺ ആണ് ചിത്രത്തിൻ്റെ രചനയും സംവിധാനവും നിർവഹിച്ചിരിക്കുന്നത്.
അഞ്ചാം വാരത്തിലും കേരളത്തിലെ 200-ൽ അധികം സ്ക്രീനുകളിൽ പ്രദർശനം തുടർന്ന 'ലോക', 200-ൽ കൂടുതൽ സ്ക്രീനുകളിൽ 50-ാം ദിവസം ആഘോഷിക്കുന്ന ആദ്യ മലയാള ചിത്രം എന്ന റെക്കോർഡ് സ്വന്തമാക്കി.
ഇരുപത്തിയൊന്നാം നൂറ്റാണ്ടിൽ ആഗോളതലത്തിൽ ഏറ്റവും അധികം പ്രേക്ഷകർ കണ്ട മലയാള ചിത്രമായി ഇത് മാറി. 1 കോടി 18 ലക്ഷത്തിലധികം പ്രേക്ഷകരാണ് ഇതിനോടകം ആഗോളതലത്തിൽ ചിത്രം കണ്ടതെന്നാണ് കണക്കുകൾ.
ഒ.ടി.ടി. റിലീസ്
ജിയോ ഹോട്സ്റ്റാറാണ് സിനിമയുടെ ഔദ്യോഗിക ഡിജിറ്റൽ സ്ട്രീമിങ് പങ്കാളി. ജിയോ ഹോട്സ്റ്റാറും വേഫെറർ ഫിലിംസും ചിത്രത്തിൻ്റെ ഡിജിറ്റൽ റിലീസ് പോസ്റ്റർ സമൂഹമാധ്യമങ്ങളിൽ പങ്കുവെച്ചെങ്കിലും, സ്ട്രീം ചെയ്യുന്ന തീയതി ഇതുവരെ പ്രഖ്യാപിച്ചിട്ടില്ല.
കേരള ചരിത്രത്തിലെ ഐതിഹ്യ കഥാപാത്രമായ കള്ളിയങ്കാട്ട് നീലിയുടെ കഥയിൽ നിന്ന് പ്രചോദനം ഉൾക്കൊണ്ടാണ് കല്യാണി പ്രിയദർശൻ കേന്ദ്രകഥാപാത്രമായി എത്തിയ ഈ ചിത്രം ഒരുക്കിയത്. അഞ്ച് ഭാഗങ്ങളുള്ള ഒരു മെഗാ ഫാന്റസി സിനിമാറ്റിക് യൂണിവേഴ്സിലെ ആദ്യ ഭാഗമാണ് ഈ ബിഗ് ബഡ്ജറ്റ് ചിത്രം. ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ എന്നിവർ നിർണായക വേഷങ്ങൾ അവതരിപ്പിച്ചു.
ദുൽഖർ സൽമാൻ, ടൊവിനോ തോമസ് എന്നിവരുടെ അതിഥി വേഷങ്ങളും മമ്മൂട്ടിയുടെ അദൃശ്യമായ സാന്നിധ്യവും ചിത്രത്തിൻ്റെ പ്രധാന ആകർഷണങ്ങളായിരുന്നു. 'ലോക' യൂണിവേഴ്സിലെ രണ്ടാം ചിത്രമായ 'ലോക: ചാപ്റ്റർ 2' അടുത്തിടെ വേഫെറർ ഫിലിംസ് പ്രഖ്യാപിച്ചിരുന്നു. രണ്ടാം ഭാഗത്തിൽ ടൊവിനോ തോമസ് ആണ് പ്രധാന കഥാപാത്രമായി എത്തുക.
ഈ വാർത്ത കേൾക്കാം
Content Summary: Malayalam's first ₹300 crore film 'Loka: Chapter One - Chandra' to go OTT
| മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു.. |
|---|
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !