തിരുവനന്തപുരം: പാമ്പുകടിയേറ്റു തിരുവനന്തപുരം മെഡിക്കൽ കോളേജ് ആശുപത്രിയിൽ കഴിയുന്ന വാവ സുരേഷിന് സൗജ്യ ചികിത്സ ഉറപ്പാക്കുമെന്ന് ആരോഗ്യമന്ത്രി കെ കെ ശൈലജ. ഇതു സംബന്ധിച്ച് സര്ക്കാര് മെഡിക്കൽ കോളേജ് ആശുപത്രി സൂപ്രണ്ട് ഡോ. എം എസ് ഷര്മദിന് നിര്ദ്ദേശം നല്കി. വാവ സുരേഷിന്റെ ആരോഗ്യനില തൃപ്തികരമാണെങ്കിലും അണുബാധയ്ക്കുള്ള സാധ്യത കണക്കിലെടുത്ത് സന്ദര്ശകര്ക്ക് കര്ശന നിയന്ത്രണമുള്ളതായി മന്ത്രി വ്യക്തമാക്കി.
ഫെബ്രുവരി 13ന് പത്തനാപുരത്ത് ഒരു വീട്ടിൽ നിന്ന് അണലിയെ പിടിക്കുന്നതിനിടെയാണ് വാവ സുരേഷിന് കടിയേറ്റത്. തുടര്ന്ന് തിരുവനന്തപുരം മെഡിക്കൽ കോളേജിൽ ചികിത്സയ്ക്കായി പ്രവേശിപ്പിക്കുകയായിരുന്നു. നലിവിൽ മള്ട്ടി സ്പെഷ്യാലിറ്റി ബ്ലോക്കിലെ മള്ട്ടി ഡിസിപ്ലിനറി ഐസിയുവിലാണ് വാവ സുരേഷ്. ഇന്നു വൈകിട്ട് പ്രത്യേക മുറിയിലേയ്ക്ക് മാറ്റുന്ന വാവ സുരേഷിന്റെ മുറിയുടെ വാടകയും സൗജന്യമായിരിക്കും. വാവ സുരേഷിനെയും അദ്ദേഹത്തെ ചികിത്സിക്കുന്ന ഡോക്ടര്മാരെയും ബന്ധപ്പെട്ടെന്നും ഭയപ്പെടേണ്ട കാര്യമില്ലെന്ന് വാവ സുരേഷിനെ ആശ്വസിപ്പിച്ചെന്നും മന്ത്രി അറിയിച്ചു.
സുരേഷിന്റെ ചികിത്സയ്ക്കായി രൂപീകരിച്ച മെഡിക്കൽ ബോര്ഡില് ആശുപത്രി സൂപ്രണ്ട് എം എസ് ഷര്മദ്, മെഡിസിന് വിഭാഗം മേധാവി ഡോ.രവികുമാര് കുറുപ്പ്, മെഡിസിന് വിഭാഗം പ്രൊഫസര് ഡോ.അരുണ, ക്രിട്ടിക്കല് കെയര് അസോ. പ്രൊഫസര് ഡോ.അനില് സത്യദാസ്, ഹെമറ്റോളജി വിഭാഗം അഡീഷണല് പ്രൊഫസര് ഡോ.ശ്രീനാഥ് എന്നിവരാണ് അംഗങ്ങള്.
വ്യാഴാഴ്ച ആശുപത്രിയിലെത്തിച്ച വാവ സുരേഷിന്റെ പ്രാഥമിക പരിശോധനയിൽത്തന്നെ വലതുകൈയ്യിൽ നീരുണ്ടെന്നും വിഷബാധയേറ്റതിന്റെ ലക്ഷണങ്ങള് ഉണ്ടെന്നും കാണാൻ സാധിച്ചതായി ആരോഗ്യമന്ത്രി അറിയിച്ചു. ഉടന് തന്നെ വാവ സുരേഷിനെ മള്ട്ടി സ്പെഷ്യാലിറ്റി ബ്ലോക്കിലെ തീവ്ര പരിചരണ വിഭാഗത്തില് പ്രവേശിപ്പിച്ച് വിഷബാധ നിര്വീര്യമാക്കാനുള്ള ആന്റി സ്നേക്ക് വെനം നല്കി നിരന്തരം നിരീക്ഷിച്ചു. പാമ്പുകടിയായതിനാല് അതീവ ശ്രദ്ധ ആവശ്യമായിരുന്നു. ആശുപത്രി സൂപ്രണ്ട് ഡോ. എം.എസ്. ഷര്മ്മദിന്റെ നേതൃത്വത്തില് പ്രത്യേക മെഡിക്കല് ബോര്ഡ് രൂപീകരിച്ചാണ് ചികിത്സ ഏകോപിപ്പിച്ചത്. ആരോഗ്യമന്ത്രി ഫേസ്ബുക്കിൽ കുറിച്ചു. വിഷം വൃക്കകളെ ബാധിക്കാതിരിക്കാനും ആന്തരിക രക്തസ്രാവം ഉണ്ടാകാതിരിക്കാനും പ്രത്യേകം ശ്രദ്ധിക്കുന്നുണ്ടെന്നും ആരോഗ്യമന്ത്രി വ്യക്തമാക്കി.
ആരോഗ്യസ്ഥിതി മെച്ചപ്പെട്ടതിനാൽ തന്നെ ഉടൻ വാര്ഡിലേയ്ക്ക് മാറ്റുമെന്നും ആശങ്കപ്പെടേണ്ടതില്ലെന്നും കാണിച്ച് ഇന്നലെ വാവ സുരേഷ് തന്നെ ഫേസ്ബുക്കിൽ പോസ്റ്റിട്ടിരുന്നു. തന്നെപ്പറ്റി സമൂഹമാധ്യമങ്ങളിൽ പ്രചരിക്കുന്ന വ്യാജവാര്ത്തകള് വിശ്വസിക്കരുതെന്നും വാവ സുരേഷ് വ്യക്തമാക്കി.
ഏറ്റവും പുതിയ വാർത്തകളും വിശേഷങ്ങളും അറിയാൻ മീഡിയ വിഷൻ ലൈവ് ന്റെ WhatsApp ഗ്രൂപ്പിൽ അംഗമാവുക !
വായനക്കാരുടെ അഭിപ്രായങ്ങള് തൊട്ടുതാഴെയുള്ള കമന്റ് ബോക്സില് പോസ്റ്റ് ചെയ്യാം. അശ്ലീല കമന്റുകള്, വ്യക്തിഹത്യാ പരാമര്ശങ്ങള്, മത, ജാതി വികാരം വ്രണപ്പെടുത്തുന്ന കമന്റുകള്, രാഷ്ട്രീയ വിദ്വേഷ പ്രയോഗങ്ങള് എന്നിവ കേന്ദ്ര സര്ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്ണ്ണ ഉത്തരവാദിത്തം രചയിതാവിനായിരിക്കും !