സംസ്ഥാനത്ത് ട്രോളിങ് നിരോധനം നാളെ അര്‍ധരാത്രി മുതല്‍ പ്രാബല്യത്തില്‍ വരും. 52 ദിവസം നീളുന്ന ട്രോളിങ് നിരോധനം ജൂലൈ 31-ന് അര്‍ധരാത്രിയാണ് അവസാനിക്കുക. ആഴക്കടല്‍ മത്സ്യബന്ധനത്തിന് നിരോധനം വരുന്നതോടെ വലിയ ബോട്ടുകള്‍ ഇന്നു മുതല്‍ മടങ്ങിയെത്തി തുടങ്ങും. എന്നാല്‍, പരമ്പരാഗത മത്സ്യത്തൊഴിലാളികള്‍ക്ക് കടലില്‍ പോകുന്നതിനു വിലക്കില്ല.
ഹാര്‍ബറിലും തീരപ്രദേശത്തും പോലീസ് കാവല്‍ ഏര്‍പ്പെടുത്തും. മത്സ്യസമ്പത്ത് വര്‍ധിപ്പിക്കുക എന്ന ലക്ഷ്യത്തോടെയാണ് മത്സ്യങ്ങളുടെ പ്രജനന കാലത്ത് ട്രോളിങ് നിരോധനം ഏര്‍പ്പെടുത്തുന്നത്.
നിരോധനം ബാധകമല്ലാത്ത ഇന്‍ ബോര്‍ഡ് വള്ളങ്ങള്‍, മറ്റു ചെറിയ യാനങ്ങള്‍ തുടങ്ങിയവക്ക് മല്‍സ്യബന്ധനം നടത്തുന്നതിന് വേണ്ടി ശക്തികുളങ്ങരയിലെയും നീണ്ടകരയിലെയും മല്‍സ്യഫെഡ് ബങ്കുകളും അഴീക്കല്‍ ഭാഗത്ത് മുന്‍വര്‍ഷങ്ങളില്‍ പ്രവര്‍ത്തിച്ചിരുന്ന ബങ്കുകളും പ്രവര്‍ത്തിക്കും. ഇവര്‍ക്ക് മല്‍സ്യം വില്‍പന നടത്തുന്നതിന് നീണ്ടകര ഹാര്‍ബര്‍ തുറക്കും.
അതേസമയം, മണ്‍സൂണ്‍കാല കടല്‍ രക്ഷാപ്രവര്‍ത്തനത്തിനും പെട്രോളിങ്ങിനുമായി നീണ്ടകരയിലും അഴീക്കലും കണ്‍ട്രോള്‍ റൂമുകള്‍ പ്രവര്‍ത്തനമാരംഭിച്ചിട്ടുണ്ട്. കടല്‍ സുരക്ഷാ സ്‌ക്വാഡിന്റെയും മറൈന്‍ പോലീസിന്റെയും സേവനം 24 മണിക്കൂറും ലഭ്യമാകും. കോസ്റ്റല്‍ പോലീസിന്റെ സ്പീഡ് ബോട്ടും ഇതിനായി സജ്ജമാക്കിയിട്ടുണ്ട്. ഇതരസംസ്ഥാന ബോട്ടുകള്‍ ട്രോളിങ് നിരോധനം ആരംഭിക്കുന്നതിന് മുന്‍പ് തീരം വിട്ട് പോകണമെന്നും നിര്‍ദ്ദേശം നല്‍കി.
ട്രോളിങ് നിരോധന കാലയളവില്‍ യന്ത്രവല്‍കൃത യാനങ്ങളില്‍ പോകുന്ന മല്‍സ്യ തൊഴിലാളികള്‍ക്കും പീലിങ് തൊഴിലാളികള്‍ക്കും സൗജന്യ റേഷന്‍ നല്‍കും. ഇതിനുള്ള അപേക്ഷ കൊല്ലം ഫിഷറീസ് ഡെപ്യൂട്ടി ഡയറക്ടറുടെ ഓഫിസിലും മല്‍സ്യഭവനുകളിലും ലഭിക്കുമെന്നും അധികൃതര്‍ അറിയിച്ചു.
Content Highlights: Trolling ban from midnight tomorrow
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !