ചെന്നൈ: ഇന്ത്യയിലെ ഐഫോണ്‍ ആരാധകര്‍ക്കൊരു സന്തോഷവാര്‍ത്ത. ഏറെ കാത്തിരിപ്പിനൊടുവില്‍ ഈ മാസം ആദ്യത്തില്‍ പുറത്തിറങ്ങിയ ഐഫോണ്‍ 14 രാജ്യത്തും നിര്‍മാണം ആരംഭിച്ചു.
ചെന്നൈയിലെ ഫോക്‌സോണ്‍ പ്ലാന്റിലാണ് ഫോണ്‍ നിര്‍മിക്കുന്നത്. ദിവസങ്ങള്‍ക്കുള്ളില്‍ ഇന്ത്യന്‍ മാര്‍ക്കറ്റുകളില്‍ പുതിയ ഫോണ്‍ എത്തുമെന്നാണ് പ്രതീക്ഷിക്കപ്പെടുന്നത്.
ഇന്ത്യയില്‍ ഐഫോണ്‍ 14 നിര്‍മിക്കുമെന്ന് നേരത്തെ ആപ്പിള്‍ പ്രഖ്യാപിച്ചിരുന്നു. പുതിയ സീരീസിന്റെ ലോഞ്ചിങ്ങിന്റെ പിന്നാലെ ഫോണിന്റെ തദ്ദേശീയ ഉല്‍പാദനത്തിന് തുടക്കമിട്ടിരിക്കുകയാണ്. പ്രധാനമായും ഇന്ത്യന്‍ വിപണി ലക്ഷ്യമിട്ടാണ് ഇവിടെ നിര്‍മാണം ആരംഭിച്ചതെങ്കിലും പുറത്തേക്ക് കയറ്റുമതി ചെയ്യുമെന്നും കമ്ബനി സൂചിപ്പിക്കുന്നുണ്ട്.
ചൈനയില്‍നിന്ന് പാര്‍ട്‌സുകള്‍ ചെന്നൈയിലെ പ്ലാന്റിലെത്തിച്ചാകും നിര്‍മാണം. അതേസമയം, തദ്ദേശീയമായ ഉല്‍പാദനത്തിലൂടെ ഐഫോണ്‍ വില ഇനിയും കുറയുമെന്നാണ് കരുതപ്പെടുന്നത്. 20 ശതമാനം ഇറക്കുമതി തീരുവയില്‍നിന്ന് ഒഴിവാകാനാകുമെന്നതു തന്നെയാണ് പ്രധാന കാര്യം. ഇത് ഫോണ്‍വിലയിലും മാറ്റമുണ്ടാക്കിയേക്കും. നിലവില്‍ 79,900 രൂപയാണ് ഐഫോണ്‍ 14ന്റെ ഇന്ത്യയിലെ അടിസ്ഥാനവില.
ആപ്പിളിന്റെ ലോകത്തെ രണ്ടാമത്തെ വലിയ വിപണിയാണ് ഇന്ത്യ. ചൈനയാണ് ഇന്ത്യയ്ക്കു മുന്നിലുള്ളത്. അതുകൊണ്ടു തന്നെ ഇന്ത്യയില്‍ ഫോണ്‍ നിര്‍മിക്കുന്നതുവഴി വന്‍ നേട്ടമാണ് കമ്ബനി പ്രതീക്ഷിക്കുന്നത്. 2017ലാണ് ഐഫോണ്‍ നിര്‍മാണം ഇന്ത്യയില്‍ ആരംഭിച്ചത്. ഐഫോണ്‍ എസ്‌ഇ, ഐഫോണ്‍ 12, ഐഫോണ്‍ 13 സീരീസുകള്‍ നിലവില്‍ ചെന്നൈയിലെ പ്ലാന്റില്‍ നിര്‍മിക്കുന്നുണ്ട്.
Content Highlights: 'Made in India' low-cost iPhone 14 soon begins manufacturing
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !