കുറ്റിപ്പുറം:മലബാറിലെ മുതിർന്ന കമ്മ്യൂണിസ്റ്റ് നേതാവും സാമൂഹ്യ പ്രവർത്തകനുമായ കെ നാരായണൻ നായർ മാസ്റ്ററുടെ സ്‌മരണാർത്ഥം സംഘടിപ്പിക്കുന്ന രാഷ്ട്രീയ നൈതികതാ സമ്മേളനം ഏപ്രിൽ 17 ന് വൈകീട്ട് 3:30 ന് കുറ്റിപ്പുറം ഫുജൈറ പാലസ് ഓഡിറ്റോറിയത്തിൽ വച്ച് നടക്കുമെന്ന് സംഘാടകർ കുറ്റിപ്പുറത്ത് വാർത്താ സമ്മേളനത്തിൽ അറിയിച്ചു
ഒരു നല്ല രാഷ്ട്രീയ പ്രവർത്തകൻ, ഒരു നല്ല പൊതു പ്രവർത്തകൻ ആകണമെന്നും, നല്ല പൊതുപ്രവർത്തകന്റെ മൂല്യസങ്കല്പം മാനവികതയാണെന്നുമുള്ള ദർശനം ജീവിതത്തിൽ സ്വാംശീകരിച്ച് സമർപ്പിതവും ത്യാഗനിർഭരവുമായ രാഷ്ട്രീയ പ്രവർത്തനമായിരുന്നു നാരായണൻ മാസ്റ്ററുടേത്.
നാരായണൻ മാസ്റ്ററുടെ അനുസ്മരണത്തോടനുബന്ധിച്ച്‌ നൈതികതയും മൂല്യബോധവും ഉയർത്തിപ്പിടിച്ച് രാഷ്ട്രീയസാമൂഹ്യ രംഗങ്ങളിൽ നിസ്വാർത്ഥവും സമർപ്പിതവുമായ പ്രവർത്തനം നടത്തി മാതൃകകളായവരെ രാഷ്ട്രീയ നൈതികതാ പുരസ്കാരം നൽകി ആദരിക്കുകയും ചെയ്യുന്നുണ്ട് .
പ്രത്യേകമായി രൂപകൽപന ചെയ്‌ത വെങ്കല ശില്പമാണ് പുരസ്കാരം.
കർമ്മകുശലതകൊണ്ടും ആശയദൃഢത കൊണ്ടും കേരളത്തിന്റെ രാഷ്ട്രീയസാമൂഹിക ഭൂമികയിൽ കഴിഞ്ഞ അഞ്ചു പതിറ്റാണ്ടിലേറെയായി നിറസാന്നിദ്ധ്യമായ സിപിഐ സംസ്ഥാന സെക്രട്ടറി കാനം രാജേന്ദ്രനെയാണ് പ്രഥമ നാരായണൻ മാസ്റ്റർ സ്മാരക രാഷ്ട്രീയ നൈതികതാ പുരസ്‌കരം നൽകി ആദരിക്കുന്നത്. ഇത് കൂടാതെ കുറ്റിപ്പുറം ഉപജില്ല വിദ്യാലയങ്ങളിലെ മികച്ച ലൈബ്രറികൾക്ക് കെ നാരായണൻ
മാസ്റ്റർ എൻഡോവ്മെന്റും നൽകുന്നുണ്ട്.
അനുസ്‌മരണ സമ്മേളനത്തിൻറെ ഉദ്ഘാടനവും, പുരസ്‌കാര സമർപ്പണവും കേരളാ ഹൈക്കോടതി ജഡ്‌ജ്‌ ജസ്‌റ്റിസ്‌ പി.വി. കുഞ്ഞികൃഷ്‌ണൻ നിർവഹിക്കും. ബിനോയ് വിശ്വം എംപി നാരായണൻ മാസ്റ്റർ അനുസ്‌മരണ പ്രഭാഷണം നടത്തും.
കെ.ടി.ജലീൽ എം.ൽ.എ., ആബിദ് ഹുസൈൻ തങ്ങൾ എം.ൽ.എ., പി.പി. സുനീർ, സത്യൻ മൊകേരി, കെ.പി. രാജേന്ദ്രൻ, പി.കെ. കൃഷ്ണദാസ്, അജിത് കൊളാടി, തുളസിദാസ്‌ മേനോൻ തുടങ്ങിയ പ്രമുഖർ സംസാരിക്കും.
സമ്മേളനത്തെ തുടർന്ന് ഇഫ്‌താർ വിരുന്നും സംഘടിപ്പിച്ചിട്ടുണ്ടെന്ന് സംഘാടക സമിതി ഭാരവാഹികളായ ജയരാജ് എം., അഡ്വ. ദീപ നാരായണൻ, അഷ്‌റഫ് അലി കാളിയത്ത്‌, അരവിന്ദാക്ഷൻ, കൈപ്പള്ളി അലി, മോഹൻ ദാസ്
എന്നിവർ കുറ്റിപ്പുറത്ത് നടന്ന വാർത്താ സമ്മേളനത്തിൽ അറിയിച്ചു.
Content Highlights: First Narayanan Master Memorial Political Ethics Award to Kanam Rajendran.
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !