ഇലക്ട്രിക് വാഹനങ്ങൾക്ക് ഇനി ശബ്ദം നിർബന്ധം; പുതിയ നിയമവുമായി കേന്ദ്ര സർക്കാർ

ന്യൂഡൽഹി: റോഡുകളിൽ ശബ്ദമില്ലാതെ ഓടുന്ന ഇലക്ട്രിക്, ഹൈബ്രിഡ് വാഹനങ്ങൾക്ക് ഇനി ശബ്ദം നിർബന്ധമാക്കാൻ കേന്ദ്ര റോഡ് ഗതാഗത, ഹൈവേ മന്ത്രാലയം തീരുമാനിച്ചു. വാഹനങ്ങളുടെ നിശബ്ദമായ സഞ്ചാരം കാൽനടയാത്രക്കാർക്കും മറ്റും അപകടമുണ്ടാക്കുന്നു എന്ന വിലയിരുത്തലിൻ്റെ അടിസ്ഥാനത്തിലാണ് മന്ത്രാലയത്തിൻ്റെ സുപ്രധാന നീക്കം.

ഇതുമായി ബന്ധപ്പെട്ട് കേന്ദ്ര മോട്ടോർ വാഹന ചട്ടത്തിൽ ഭേദഗതി വരുത്തുന്നതിനുള്ള കരട് വിജ്ഞാപനം പുറത്തിറക്കിയിട്ടുണ്ട്.

പുതിയ നിയമം നിലവിൽ വരുന്നത് ഇങ്ങനെ:

2026 ഒക്ടോബർ 1 മുതൽ: വിപണിയിൽ ഇറങ്ങുന്ന പുതിയ മോഡൽ ഇലക്ട്രിക് വാഹനങ്ങൾക്ക് ഈ നിയമം നിർബന്ധമാക്കും.

2027 ഒക്ടോബർ 1 മുതൽ: എല്ലാ മോഡലുകളിലുള്ള ഇലക്ട്രിക്, ഹൈബ്രിഡ് വാഹനങ്ങളിലേക്കും ഈ നിയമം വ്യാപിപ്പിക്കാനാണ് മന്ത്രാലയത്തിൻ്റെ നിർദ്ദേശം.

അക്കൂസ്റ്റിക് വെഹിക്കിൾ അലർട്ടിങ് സിസ്റ്റം (AVS)

വാഹനങ്ങൾ സഞ്ചരിക്കുമ്പോൾ ഒരു നിശ്ചിത ശബ്ദം പുറപ്പെടുവിക്കുന്ന അക്കൂസ്റ്റിക് വെഹിക്കിൾ അലർട്ടിങ് സിസ്റ്റം (AVS) വാഹനങ്ങളിൽ ഉൾപ്പെടുത്താനാണ് നിലവിൽ തീരുമാനിച്ചിരിക്കുന്നത്. ശബ്ദമില്ലാത്ത ഇലക്ട്രിക് വാഹനങ്ങൾ ഉണ്ടാക്കുന്ന അപകടങ്ങൾ ഒരു പരിധി വരെ കുറയ്ക്കാൻ ഈ സംവിധാനത്തിലൂടെ സാധിക്കുമെന്നാണ് അധികൃതരുടെ വിലയിരുത്തൽ.

ഈ ഉത്തരവിനെക്കുറിച്ച് പൊതുജനങ്ങളുടെ അഭിപ്രായങ്ങളും നിർദ്ദേശങ്ങളും 30 ദിവസത്തിനുള്ളിൽ അറിയിക്കാവുന്നതാണ്.

ഈ വാർത്ത കേൾക്കാം

Content Summary: Electric vehicles will now have to make noise; Central government introduces new law

മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..