ആനക്കൊമ്പ് കേസ്: മോഹൻലാലിനും സർക്കാരിനും തിരിച്ചടി, ഉടമസ്ഥാവകാശം നിയമപരമാക്കിയ ഉത്തരവ് ഹൈക്കോടതി റദ്ദാക്കി

കൊച്ചി|നടൻ മോഹൻലാൽ ആനക്കൊമ്പ് കൈവശം വെച്ച നടപടി നിയമവിധേയമാക്കിക്കൊണ്ട് സംസ്ഥാന സർക്കാർ പുറത്തിറക്കിയ ഉത്തരവ് ഹൈക്കോടതി റദ്ദാക്കി. ഈ വിഷയത്തിൽ മോഹൻലാലിനും സംസ്ഥാന സർക്കാരിനും ഇത് കനത്ത തിരിച്ചടിയാണ്. വനംവകുപ്പിൻ്റെ നടപടി നിയമപരമായി നിലനിൽക്കില്ലെന്ന് വ്യക്തമാക്കിയ കോടതി, പുതിയ വിജ്ഞാപനം പുറത്തിറക്കാൻ സംസ്ഥാന സർക്കാരിന് നിർദേശം നൽകി.

കോടതിയുടെ നിരീക്ഷണങ്ങൾ:

ആനക്കൊമ്പ് കൈവശം വച്ചതുമായി ബന്ധപ്പെട്ട് സർക്കാർ നടപടികളിൽ വീഴ്ച സംഭവിച്ചതായി കോടതി ചൂണ്ടിക്കാട്ടി. 2015-ലെ സർക്കാർ വിജ്ഞാപനം ഗസറ്റിൽ പ്രസിദ്ധീകരിച്ചില്ല എന്നത് ഗുരുതരമായ പിഴവാണെന്നും കോടതി നിരീക്ഷിച്ചു.

മോഹൻലാൽ ആനക്കൊമ്പ് കൈവശം വെച്ച നടപടി നിയമപരമാക്കിയ സർക്കാർ ഉത്തരവിനെ ചോദ്യം ചെയ്ത് എറണാകുളം സ്വദേശിയടക്കം നൽകിയ ഹർജികളിലാണ് ജസ്റ്റിസുമാരായ ഡോ. എ.കെ. ജയശങ്കരൻ നമ്പ്യാർ, ജോബിൻ സെബാസ്റ്റ്യൻ എന്നിവരടങ്ങിയ ഡിവിഷൻ ബെഞ്ച് വിധി പറഞ്ഞത്.

വനംവകുപ്പിന്റെ മുൻ നിലപാട്:

മോഹൻലാലിൻ്റെ കൈവശം ആനക്കൊമ്പ് എത്തിയത് നിയമവിരുദ്ധ മാർഗങ്ങളിലൂടെയല്ല എന്നായിരുന്നു വനംവകുപ്പിൻ്റെ നിലപാട്. യഥാർത്ഥ ഉറവിടം ശരിയാണെന്ന് കണ്ടെത്തിയതിനാലാണ് 4 ആനക്കൊമ്പുകൾ കൈവശം വയ്ക്കുന്നത് നിയമവിധേയമാക്കിയത് എന്നും വനംവകുപ്പ് കോടതിയെ അറിയിച്ചിരുന്നു.

സംഭവത്തിൻ്റെ പശ്ചാത്തലം:

2011-ൽ മോഹൻലാലിൻ്റെ വീട്ടിൽ റെയ്ഡിനെത്തിയ ആദായ നികുതി വകുപ്പ് സംഘമാണ് നാല് ആനക്കൊമ്പുകൾ കണ്ടെത്തിയത്. 2015-ൽ ആനക്കൊമ്പുകൾ ഡിക്ലയർ ചെയ്യാൻ സർക്കാർ അവസരം നൽകിയതിനെ തുടർന്ന്, 2016 ജനുവരി 16-ന് അന്നത്തെ ചീഫ് വൈൽഡ് ലൈഫ് വാർഡൻ മോഹൻലാലിന് ഉടമസ്ഥാവകാശ സർട്ടിഫിക്കറ്റ് നൽകിയിരുന്നു.

ഈ വാർത്ത കേൾക്കാം

Content Summary: Ivory case: Setback for Mohanlal and the government, High Court quashes order legalizing ownership

മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

ഏറ്റവും പുതിയ വാർത്തകൾ: