ആർത്താറ്റ് വാഹനാപകടം: കാർ യാത്രികർ മദ്യലഹരിയിലെന്ന് സംശയം; ഡ്രൈവർ ബെൻ ഒളിവിൽ

കുന്നംകുളം: ആർത്താറ്റ് പള്ളിക്കുസമീപം കുറുക്കൻപാറ സെന്ററിൽ കാർ ബൈക്കിലിടിച്ച് ദമ്പതികളും മൂന്നുവയസ്സുകാരനായ മകനും മരിച്ച സംഭവത്തിൽ കാർ ഡ്രൈവർ ഒളിവിൽ. ആർത്താറ്റ് സ്വദേശിയായ ബെനെതിരെ കുന്നംകുളം പോലീസ് ജാമ്യമില്ലാ വകുപ്പ് പ്രകാരം കേസെടുത്തു.

അപകടസമയത്ത് ബെൻ ഉൾപ്പെടെ നാലുപേരാണ് കാറിലുണ്ടായിരുന്നതെന്നാണ് പോലീസ് നൽകുന്ന വിവരം. ഇവർ മദ്യലഹരിയിലായിരുന്നെന്നും കാർ അമിതവേഗത്തിലായിരുന്നെന്നും അന്വേഷണത്തിൽ സൂചന ലഭിച്ചതായി റിപ്പോർട്ടുകളുണ്ട്.

അപകടത്തിന് പിന്നാലെ കാർ ഓടിച്ചിരുന്ന ബെനും മറ്റൊരാളും സംഭവസ്ഥലത്ത് നിന്ന് രക്ഷപ്പെട്ടു. കാറിലുണ്ടായിരുന്ന ഒരാളെ കുന്നംകുളം പോലീസ് കസ്റ്റഡിയിലെടുത്തിട്ടുണ്ട്. ഒളിവിലുള്ള ബെനെയും മറ്റൊരാളെയും കണ്ടെത്തുന്നതിനായി പോലീസ് അന്വേഷണം ശക്തമാക്കി.

ശനിയാഴ്ച അർദ്ധരാത്രിയോടെയായിരുന്നു ദാരുണമായ അപകടം. വിവാഹച്ചടങ്ങിൽ പങ്കെടുത്ത ശേഷം വീട്ടിലേക്ക് മടങ്ങുകയായിരുന്ന ചാവക്കാട് എടക്കഴിയൂർ ഖാദിരിയ റോഡ് സ്വദേശികളായ താഴത്ത് വീട്ടിൽ മുനീർ, ഭാര്യ ഷിഫ്ന, മൂന്നുവയസ്സുകാരനായ മകൻ എമിൽ ഐബക്ക് എന്നിവരാണ് അപകടത്തിൽ മരിച്ചത്.

സൗദി അറേബ്യയിൽ ജോലി ചെയ്തിരുന്ന മുനീർ ഒരു മാസം മുമ്പാണ് അവധിക്കായി നാട്ടിലെത്തിയത്. കുടുംബത്തിന്റെ അപ്രതീക്ഷിത വിയോഗം പ്രദേശത്ത് വലിയ ദുഃഖത്തിനിടയാക്കി.

സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് കുന്നംകുളം പോലീസ് അറിയിച്ചു.

Content Summary: Three members of a family, including a three-year-old child, were killed after a speeding car allegedly driven by intoxicated occupants hit their bike near Arthatt in Kunnamkulam; the driver is absconding, and police have registered a non-bailable case.

മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

ഏറ്റവും പുതിയ വാർത്തകൾ: