നാട്ടിക: ദേശീയപാത 66-ൽ തൃശൂർ ജില്ലയിലൂടെ കടന്നുപോകുന്ന വാഹനങ്ങൾക്ക് നാളെ മുതൽ ടോൾ ഏർപ്പെടുത്തുന്നു. നാട്ടികയിൽ സ്ഥാപിച്ചിട്ടുള്ള ടോൾ പ്ലാസയിലെ നിരക്കുകൾ ദേശീയപാത അതോറിറ്റി (NHAI) ഔദ്യോഗികമായി വിജ്ഞാപനം ചെയ്തു. ഹരിയാന ആസ്ഥാനമായുള്ള സ്കൈലാർക്ക് കമ്പനിക്കാണ് ടോൾ പിരിവിൻ്റെ ചുമതല. ടോൾ പിരിവിനായി ജീവനക്കാർ നാട്ടികയിലെത്തിയിട്ടുണ്ട്.
എന്നാൽ, നിർമാണ പ്രവൃത്തികൾ പൂർണ്ണമായി തീരുന്നതിന് മുൻപേ ടോൾ പിരിക്കാനുള്ള നീക്കത്തിനെതിരെ പ്രദേശവാസികളും സമരസമിതിയും ശക്തമായ പ്രതിഷേധത്തിലാണ്. കാപ്പിരിക്കാട്–കൊടുങ്ങല്ലൂർ റൂട്ടിലെ ചാവക്കാട് ബൈപ്പാസ്, വാടാനപ്പള്ളി ഫ്ലൈ ഓവർ, ചേറ്റുവ പാലം, എടമുട്ടം അടിപ്പാത, കൊറ്റംകുളം സി.വി. ജങ്ഷൻ പാലം എന്നിവയുടെ പണികൾ ഇനിയും പൂർത്തിയായിട്ടില്ല. കൂടാതെ നാട്ടിക, വലപ്പാട് ഹൈസ്കൂൾ, കൈപ്പമംഗലം കൊപ്രക്കളം, ശ്രീനാരായണപുരം പള്ളിനട, ഏങ്ങണ്ടിയൂർ പൊക്കുളങ്ങര, മണത്തല, എടക്കഴിയൂർ, മന്ദലാംകുന്ന് എന്നിവിടങ്ങളിലെ നടപ്പാലങ്ങളുടെ നിർമാണവും പാതിവഴിയിലാണ്.
കാർ, ജീപ്പ്, വാൻ, മറ്റ് എൽ.എം.വി വാഹനങ്ങൾക്ക് ഒറ്റയാത്രയ്ക്ക് 120 രൂപയും മടക്കയാത്ര ഉൾപ്പെടെയുള്ള ഒരു ദിവസത്തെ യാത്രയ്ക്ക് 180 രൂപയുമാണ് നിരക്ക്. 50 യാത്രകൾക്കുള്ള പ്രതിമാസ നിരക്ക് 3,995 രൂപയാണ്. ബസ്, ട്രക്ക് എന്നിവയ്ക്ക് ഒറ്റയാത്രയ്ക്ക് 405 രൂപയും മടക്കയാത്രയ്ക്ക് 610 രൂപയും പ്രതിമാസ പാസിന് 13,525 രൂപയും നൽകണം. ഭാരമേറിയ നിർമാണ യന്ത്രങ്ങൾക്കും എർത്ത് മൂവിങ് എക്യുപ്മെന്റുകൾക്കും ഒറ്റയാത്രയ്ക്ക് 635 രൂപയും മടക്കയാത്രയ്ക്ക് 955 രൂപയുമാണ് നിരക്ക്. അതേസമയം, ടോൾ പ്ലാസയുടെ 20 കിലോമീറ്റർ ചുറ്റളവിലുള്ള വാണിജ്യേതര വാഹനങ്ങൾക്ക് പ്രതിമാസം 360 രൂപയുടെ ഇളവ് പാസ് ലഭിക്കും.
അതേസമയം, ആദ്യ ഡിസൈനിലുണ്ടായ മാറ്റങ്ങളാണ് നിർമാണം വൈകാൻ കാരണമെന്ന് നിർമാണ കമ്പനിയായ ശിവാലയ കൺസ്ട്രക്ഷൻസ് അറിയിച്ചു. പാലങ്ങളുടെ അപ്രോച്ച് റോഡുകൾക്ക് പകരം പൈലിങ്ങും പില്ലറുകളും ഉപയോഗിച്ച് നിർമാണം നടത്തേണ്ടി വന്നതോടെ ഓരോ പാലത്തിന്റെയും നീളം 400 മീറ്റർ വീതം വർധിക്കുകയും കൊറ്റംകുളം പാലം ഒരു കിലോമീറ്ററോളം നീളത്തിലാവുകയും ചെയ്തു. ഈ പണികൾ പൂർത്തിയാകാൻ ഒന്നര വർഷത്തോളം സമയമെടുക്കുമെന്നും അധികൃതർ വ്യക്തമാക്കി. നിർമാണം പൂർണ്ണമാകുന്നതോടെ ടോൾ നിരക്ക് വീണ്ടും വർധിച്ചേക്കുമെന്ന ആശങ്കയും ഉയരുന്നുണ്ട്.
Content Summary: Toll collection at Nattika Toll Plaza on NH 66 in Thrissur starts tomorrow with basic single-trip rates set at ₹120 for light motor vehicles, sparking criticism due to unfinished bridge and flyover construction work.
| മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു.. |
|---|
വായനക്കാരുടെ അഭിപ്രായങ്ങള്‍ തൊട്ടുതാഴെയുള്ള കമന്റ് ബോക്‌സില്‍ പോസ്റ്റ് ചെയ്യാം. അശ്ലീല കമന്റുകള്‍, വ്യക്തിഹത്യാ പരാമര്‍ശങ്ങള്‍, മത, ജാതി വികാരം വ്രണപ്പെടുത്തുന്ന കമന്റുകള്‍, രാഷ്ട്രീയ വിദ്വേഷ പ്രയോഗങ്ങള്‍ എന്നിവ കേന്ദ്ര സര്‍ക്കാറിന്റെ ഐ ടി നിയമപ്രകാരം കുറ്റകരമാണ്. കമന്റുകളുടെ പൂര്‍ണ്ണ ഉത്തരവാദിത്തം രചയിതാവിനായിരിക്കും !