ഇന്ന് വിജയദശമി; അറിവിന്റെ ആദ്യാക്ഷര ലോകത്തേക്ക് ആയിരക്കണക്കിന് കുരുന്നുകൾ

തിരുവനന്തപുരം: ഇന്ന് വിജയദശമി. അറിവിൻ്റെ ലോകത്തേക്ക് പിച്ചവെച്ച് കയറാൻ ആയിരക്കണക്കിന് കുഞ്ഞുങ്ങളാണ് ഇന്ന് ആദ്യാക്ഷരം കുറിക്കുന്നത്. വിദ്യാരംഭത്തിന് ഏറ്റവും ഉത്തമമായ ദിവസമായാണ് വിജയദശമിയെ കണക്കാക്കുന്നത്. കേരളത്തിലെ വിവിധ ക്ഷേത്രങ്ങളിലും സാംസ്കാരിക സ്ഥാപനങ്ങളിലും പ്രമുഖ മാധ്യമ സ്ഥാപനങ്ങളിലുമടക്കം വിദ്യാരംഭ ചടങ്ങുകൾ ഇന്ന് നടക്കും.

ദക്ഷിണ മൂകാംബിക എന്നറിയപ്പെടുന്ന കോട്ടയം പനച്ചിക്കാട് ദേവീക്ഷേത്രം ഉൾപ്പെടെയുള്ള ആരാധനാലയങ്ങളിലും മലപ്പുറത്തെ തുഞ്ചൻ പറമ്പ് അടക്കമുള്ള സാംസ്കാരിക കേന്ദ്രങ്ങളിലും വിദ്യാരംഭ ചടങ്ങുകൾ നടക്കുകയാണ്. സംസ്ഥാനത്തുടനീളം സാഹിത്യ, സാമൂഹിക രംഗത്തെ പ്രമുഖർ കുഞ്ഞുങ്ങൾക്ക് ആദ്യാക്ഷരം പകർന്നുനൽകും.

വിദ്യാരംഭം: ആചാരവും വിശ്വാസവും

വിദ്യാദേവതയായ സരസ്വതിയുടെ അനുഗ്രഹം തേടുന്ന ഈ ചടങ്ങിൽ, അച്ഛനോ അമ്മയോ ഗുരുസ്ഥാനീയരായവരോ കുട്ടിയെ മടിയിലിരുത്തി മണലിലോ അരിയിലോ 'ഹരിഃ ശ്രീഗണപതയേ നമഃ' എന്ന് എഴുതിക്കുന്നു. അതിനുശേഷം സ്വർണമോതിരം കൊണ്ട് നാവിൽ 'ഹരിശ്രീ' എന്നെഴുതുന്നതോടെ കുഞ്ഞ് അറിവിന്റെ ലോകത്തേക്ക് പ്രവേശിക്കുന്നു എന്നാണ് വിശ്വാസം.

വിജയദശമി: നന്മയുടെ വിജയം

ഇന്നത്തോടെ ഈ വർഷത്തെ നവരാത്രി ആഘോഷങ്ങൾ പരിസമാപ്തിയിൽ എത്തുകയാണ്. അസുരരാജാവായിരുന്ന മഹിഷാസുരനെ ദുർഗ്ഗ ദേവി വധിച്ച ദിവസമാണ് വിജയദശമി. തിന്മയ്ക്ക് മേൽ നന്മ വിജയം നേടിയ ദിനമായാണ് പൊതുവെ ഈ ദിവസം കണക്കാക്കുന്നത്.

കേരളത്തിൽ നവരാത്രി പൂജയുടെ അവസാനദിനമാണ് വിജയദശമിയായി ആഘോഷിക്കുന്നത്. രാവണനു മേൽ ശ്രീരാമൻ നേടിയ വിജയത്തിൻ്റെ ആഘോഷമായാണ് വടക്കു-തെക്ക് സംസ്ഥാനങ്ങളിൽ വിജയദശമി.

കിഴക്ക്, വടക്കു-കിഴക്കൻ സംസ്ഥാനങ്ങളിൽ മഹിഷാസുരനെ വധിച്ച ദുർഗ്ഗാദേവിയുടെ വിജയമായാണ് ഈ ദിനം ആഘോഷിക്കുന്നത്.

ത്രൈലോക്യങ്ങൾ കീഴടക്കിയ മഹിഷാസുരനെതിരെ ദേവന്മാരുടെയെല്ലാം ശക്തി ഒന്നിച്ചു ചേർന്ന് ദുർഗ്ഗാ ദേവി രൂപമെടുത്തതിൻ്റെ ഓർമ്മ കൂടിയാണ് ഈ ദിനം.

ഈ വാർത്ത കേൾക്കാം

Content Summary: Today is Vijayadashami; Thousands of children enter the world of knowledge

മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

ഏറ്റവും പുതിയ വാർത്തകൾ: