ഇന്ത്യൻ ശാസ്ത്രജ്ഞർക്ക് ചരിത്ര നേട്ടം: രാജവെമ്പാലയുടെയും മൂർഖന്റെയും വിഷം നിർവീര്യമാക്കാൻ ശേഷിയുള്ള പുതിയ ആന്റിവെനം വികസിപ്പിച്ചു

ന്യൂഡൽഹി: ഇന്ത്യയിലുടനീളം കാണപ്പെടുന്ന വിവിധ ഇനം മൂർഖൻ പാമ്പുകളുടെയും രാജവെമ്പാലയുടെയും വിഷം ഫലപ്രദമായി നിർവീര്യമാക്കാൻ ശേഷിയുള്ള പുതിയ ആന്റിവെനം ശാസ്ത്രജ്ഞർ വികസിപ്പിച്ചു. ബെംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ (IISc) ഗവേഷകർ ഡെൻമാർക്ക് ടെക്നിക്കൽ യൂണിവേഴ്സിറ്റിയുടെ സഹകരണത്തോടെയാണ് ഈ നിർണായക കണ്ടെത്തൽ നടത്തിയത്.

ലോകമെമ്പാടും പ്രതിവർഷം ലക്ഷത്തിലധികം ആളുകൾ പാമ്പുകടിയേറ്റ് മരിക്കുന്നുണ്ടെന്നാണ് കണക്ക്. ഇതിൽ പകുതിയോളം മരണങ്ങളും റിപ്പോർട്ട് ചെയ്യുന്നത് ഇന്ത്യയിലാണ്. നിലവിൽ ഉപയോഗിക്കുന്ന ഭൂരിഭാഗം ആന്റിവെനങ്ങളും കുതിരകളുടെ പ്ലാസ്മയിൽ നിന്ന് വേർതിരിച്ചെടുക്കുന്ന ആന്റിബോഡികൾ ഉപയോഗിച്ചാണ് നിർമ്മിക്കുന്നത്. എന്നാൽ ഇവയ്ക്ക് പാമ്പിന്റെ വർഗവും ഭൂമിശാസ്ത്രപരമായ പ്രദേശവും അനുസരിച്ച് ഫലപ്രാപ്തിയിൽ വ്യത്യാസം വരാറുണ്ട്. ഈ പരിമിതി മറികടക്കാനാണ് പുതിയ റീകോംബിനന്റ് ആന്റിവെനം സഹായിക്കുന്നത്.

'നാനോബോഡികൾ' (VHHs) എന്നറിയപ്പെടുന്ന അഞ്ച് പ്രത്യേക ആന്റിബോഡികൾ കൂട്ടിയോജിപ്പിച്ചാണ് ശാസ്ത്രജ്ഞർ ഈ കോക്ടെയിൽ തയാറാക്കിയത്. വിഷപാമ്പുകളുടെ കടയിലൂടെ ശരീരത്തിലെത്തുന്ന ആൽഫാ ന്യൂറോടോക്സിനുകൾ, സൈറ്റോടോക്സിനുകൾ, ഫോസ്ഫോലിപേസസ് എ2 എന്നീ മൂന്ന് പ്രധാന വിഷഘടകങ്ങളെ നേരിടാൻ ഇതിന് കഴിയും. തളർവാതം, കോശങ്ങളുടെ നാശം തുടങ്ങി ജീവന് ഭീഷണിയാകുന്ന പാർശ്വഫലങ്ങൾ പൂർണ്ണമായി തടയാൻ പുതിയ കണ്ടെത്തൽ സഹായിക്കും. എലികളിൽ നടത്തിയ ആദ്യഘട്ട പരീക്ഷണം വിജയകരമായിരുന്നു. വരും ദിവസങ്ങളിൽ ഇത് മനുഷ്യർക്കായി ലഭ്യമാകുന്നതോടെ ഇന്ത്യയിലെ പാമ്പുകടി മൂലമുള്ള മരണനിരക്ക് വൻതോതിൽ കുറയ്ക്കാനാകുമെന്നാണ് പ്രതീക്ഷിക്കുന്നത്.

Content Summary: Indian scientists from IISc Bengaluru, in collaboration with the Technical University of Denmark, have developed a new recombinant antivenom capable of neutralizing the venom of various cobra species and the king cobra. Utilizing five specialized nanobodies (VHHs), this innovative antivenom targets three major toxin groups to prevent paralysis and tissue damage. Successful initial trials in mice offer a promising solution to reduce snakebite fatalities, particularly in India, which accounts for nearly half of global snakebite deaths.

മീഡിയവിഷൻ ലൈവ് വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

ഏറ്റവും പുതിയ വാർത്തകൾ: